Ja israʼelenyo cha yawekan yaʼteltajel ja Jyoba sok och yaʼteltaye kʼulubʼal dyosik. Pe yajni ixtalajiye yuja swinkil Ammón, mi koltajiye yuja kʼulubʼal dyosik jaw. Ja israʼelenyo yiʼaje wokol jitsan jabʼil. Tixa yalawe yabʼ ja Jyoba: «Jleʼata jmultikon. Awa pabor, koltayotikon sbʼaja jkontratikon». Ja israʼelenyo xchʼayawe snajel ja kʼulubʼal dyosiki sok cha kʼe yaʼteltaye ja Jyoba. Anto ja Jyoba mixa tekʼxiyuj yiljel ja swokole.

Ja yuj ja israʼelenyo stsaʼawe jun kʼakʼanum sbʼiʼil Jefté. Yeʼn kʼot olomal ja bʼa kʼakʼanel bʼa tiroʼanel soka swinkil Ammón. Ja Jefté yala yabʼ ja Jyoba: «Yujkʼa akoltayotikon skʼulajel ganar ja tiroʼaneli, wa xkʼapawi ojni kawi ja maʼ bʼajtan xjak staʼon yajni la kumxiyoni».  Ja Jyoba smaklay ja yorasyon ja Jefté sok skolta skʼulajel ganar ja tiroʼaneli.

Yajni ja Jefté kumxi ja bʼa snaj, ja maʼ bʼajtan eljan bʼa jak staʼi jani ja yakʼixi. Sok kechanta june ja yakʼixi. Wan chanel eljani sok wan yajel okʼuk ja xchijchij. Jaxa wego, ¿jas maʼ oj skʼuluk ja Jefté? Julskʼujol ja jas skʼapuneji sok yala: «¡Ay miyuk, kala akʼix! Wa syatsʼa sbʼaj ja jkʼujoli. Ay jas jkʼapayi ja Jyoba sok bʼa yajel kʼotuk tʼilani oj jeka aʼtel bʼa tabernáculo bʼa Siló». Ja yakʼixi sjakʼa: «Tat, ta jach akʼapayi ja Jyoba, tʼilani oj wa kʼotuk. Kechan wa xkʼanawi bʼa oja jekon chabʼ ixaw soka kamigaʼik bʼa witsaltik. Tsaʼan, tixa oj wajkon ja bʼa tabernáculo». Ja yakʼix ja Jefté tojni waji sok yaʼteltay ja Jyoba bʼa tabernáculo spetsanil ja sakʼanili. Jabʼil jabʼil, ja yamigaʼiki wa xwaj yulataye man Siló.