Obwire bukahika Abaisareri bayongera bajemera Yahwe kandi bagarukamu kuramya baruhanga ab’ebisuba. Abamoni obu baramagiire Isareri bagirwanisa, baruhanga ab’ebisuba aba Isareri batabajune. Baitu Abaisareri bakamara emyaka nyingi nibabonabona. Hakumalirra, bakagambira Yahwe bati: ‘Tukusisiire. Nitukwesengereza otukonyere otujune hali abanyanzigwa baitu.’ Abaisareri bakahwerekereza ebisisani byabo bagarukamu kuramya Yahwe. Kandi Yahwe akaba atakyagonza kurora nibabonabona.

Yefuta nuwe yakomerwe nk’omurwani ow’okwebembera abantu kugenda kurwanisa Abamoni. Akagambira Yahwe ati: ‘Obworatukonyera kusingura obulemu bunu, ninkuraganiza ngu  obu ndigaruka omu ka, ndikuha omuntu w’okubanza alituruka omu nju yange kuntangirra.’ Yahwe akahurra okusaba kwa Yefuta yamukonyera kusingura obulemu.

Yefuta obuyagarukire omu ka ye, omwana we omu wenka omwisiki nuwe yarugireyo kumutangirra. Akaba nacekeca kandi nateera enjogera. Kiki Yefuta ekiyakukozere? Akaijuka eky’akaba araganiize Yahwe yagamba ati: ‘Zimboine mwana wange! Oncwire omutima. Nkaraganiza Yahwe. Kusobora kuhikiriza ekinamuraganiize, oine kugenda kumuheereza ha hema ye enyakuli omu Siro.’ Baitu muhara we akamugarukamu ati: ‘Taata, obworaaba waraganiize Yahwe, hikiriza eki wamuraganiize. Ninkusaba ekintu kimu kyonka, ondeke male ameezi abiri ndi n’abaisiki banywani bange omu nsozi nukwo hanyuma ngende.’ Muhara wa Yefuta akaheereza ha hema obwomeezi bwe bwona. Buli mwaka, abanywani be bagendaga Siro kumubungira.