Израильчилер катап база Иеговага дыңнангыр эвес апарып, меге бурганнарга чүдүп эгелээн. Аммоннар израильчилерже халдап кээрге, меге бурганнары оларга дузалаваан. Олар хөй чылдар ишти хинчектенип келген. Ам-на олар Иеговадан чаннып дилээн: «Бис бачыт үүлгеттивис. Бисти дайзыннарывыстан камгалап көрем!» Израильчилер дүрзү-бурганнарын узуткааш, катап Иеговага бараалгап эгелээн. Ынчан Иегова оларны камгалаар деп шиитпирлеп алган.

Аммоннар-биле тулчур кылдыр, Иегова Иеффай деп дайынчыны шилип алган. Ол Иеговага: «Бо дайынны тиилеп алырынга дузалаар болзуңза, мени уткуп, бажыңдан бир  дугаар үнүп келген кижини сеңээ бээр мен» — деп аазаан. Иегова Иеффайның мөргүлүнге харыылап, аңаа тиилелгени берген.

Иеффайның чаңгыс борбак кызы ону баштай уткуп үнүп келген. Ол самнап, тимпанга ойнап турган. Иеффай канчалган? Ол: «Чүгле сен эвес уруум! Мени ат кылдың. Мен Иеговага аазаашкын бердим. Ам ону күүседир дээш, сени Силомче чоргузар апаар-дыр мен. Сен аңаа ыдыктыг өргээ-майгынга Иеговага бараалгаар сен» — дээн. Уруу аңаа харыылаан: «Ачай, Иеговага аазаан болзуңза, сөзүңге ээ бол. Эштерим уруглар-биле чүгле ийи ай ишти дагларже баарын чөпшээреп көр. Ооң соонда Силомче чоруптар мен». Иеффайның уруу бүгү чуртталгазында ыдыктыг өргээ-майгынга Иеговага бараалгап келген. Чыл санында ооң эштери Силомче барып, ужуражыр турган.