Te israeletik la yijkʼitayik ta yichʼel ta mukʼ yan buelta te Jehová sok jajchik ta yichʼel ta mukʼ lotil diosetik. Pero te lotil diosetik-abi maba kanantayotik yuʼun te kʼalal la yichʼik ochintayel yuʼun te amonetike. Te lum bayal jaʼbil la yil swokolik. Jaʼ yuʼun la yalbeyik te Jehová: “La jta jmultik ta atojol. Awokoluk, koltayawotik ta skʼab te jkontrataktike”. Te israeletik la swuyik ta jkʼaxel te lokʼombaetik sok och yichʼik ta mukʼ yan buelta te Jehová, jich yuʼun te Jehová ma la skʼan yilix te ya xkʼax bayal swokolike.

Jich yuʼun te israeletik la stsaik jtul winik te ya snaʼ yakʼel guerra te Jefté sbiile. Te jaʼ jwolwanej ya xkʼot yuʼunik kʼalal ya yakʼbeyik guerra te amonetike. Te Jefté la yalbey te Jehová: “Teme ya akoltayotik ta stsalel te jkontrataktike, jamal ya kalbat te ya  kakʼbat te machʼa nail ya xlokʼ staon te kʼalal ya sujton tal ta jnae”. Te Jehová la yaʼiybey skʼop te Jefté, jich la skoltay ta tsalaw.

Kʼalal sujt tal ta sna te Jefté, te machʼa nail lokʼ ta tael yuʼune, jaʼ te jip jtul yantsil nichʼane. Yak tal ta ajkʼot sok yak ta stijel te spandereta. Jich yuʼun, ¿bin la spasix-a te Jefté? Jul ta yoʼtan te bin jamal la yale, jich la yal: “¡Aay, kantsil nichʼan! Ya awakʼbon jmel koʼtan ta jkʼaxel. Ay bin la kalbey ta jamal te Jehová, swenta ya jkʼotes ta pasel ya skʼan ya jtikunat bael ta nailpakʼ templo yuʼun Silo swenta ya x-abatinat tey-a”. Te yantsil nichʼane jich la sut: “Jtat, teme ay bin jamal la awalbey te Jehová, ya skʼan ya akʼotes ta pasel. Jaʼnax ya jkʼanbat te ya awakʼon bael sok te kamigatak ta witstikil chebuk u, ta patil-abi ya xboon ta nailpakʼ templo”. Te yantsil nichʼan te Jefté jun yoʼtan la yakʼ sba ta stojol Dios sok abatin ta nailpakʼ templo te jayeb kʼajkʼal kuxine. Ta jujun jaʼbil ulaʼtayot yuʼun te yamigatak ta Silo.