Vhaisiraele vho dovha vha ṱutshela Yehova nahone vha thoma u gwadamela midzimu ya mazwifhi. Musi Vhaamoni vha tshi vutshela na u lwa na Vhaisiraele, yeneyo midzimu ya mazwifhi a yo ngo kona u vha thusa. Vhaisiraele vho shengedzwa miṅwaha minzhi. Vha fheleledza vho ri kha Yehova: ‘Ro tshinya. Ri humbela uri u ri tshidze kha maswina ashu.’ Vhaisiraele vha fhelisa midzimu yavho ya zwifanyiso nahone vha dovha vha gwadamela Yehova. Yehova o vha a sa ṱoḓi u vha vhona vha tshi khou shengela.

Ho khethiwa mudzia-mmbi ane a pfi Yefeta uri a range phanḓa vhathu musi vha tshi ya u lwa na Vhaamoni. O ri kha Yehova: ‘Arali wa ri thusa u kunda ino nndwa, ndi a u fulufhedzisa uri musi ndi tshi vhuyelela hayani, ndi ḓo u fha muthu ane a ḓo bva u thoma nḓuni yanga u ḓo u nṱanganedza.’ Yehova a thetshelesa thabelo ya Yefeta nahone a mu thusa u kunda nndwani.

 Musi Yefeta a tshi vhuyelela hayani, muthu wa u thoma u mu ṱanganedza ho hu ṅwana wawe wa musidzana, ṅwana wawe muthihi fhedzi. O vha a tshi khou tshina na u lidza murumba. Yefeta o vha a tshi ḓo ita mini? O humbula zwe a fulufhedzisa nahone a ri: ‘Yawee, ṅwananga! No mmbaisa mbilu. Ndo fulufhedzisa Yehova. U ḓadzisa zwenezwo, ndi fanela u ni isa u yo shuma thebenekeleni ngei Silo.’ Fhedzi ṅwananyana wawe a ri: ‘Khotsi anga, arali vho fulufhedzisa Yehova, vha tea u ita nga u ralo. Zwine nda humbela fhedzi ndi uri ndi fhedze miṅwedzi mivhili ndi dzithavhani na khonani dzanga dza vhasidzana. Nga murahu ha zwenezwo ndi ḓo ṱuwa.’ Ṅwananyana wa Yefeta a shuma thebenekeleni nga u fulufhedzea vhutshilo hawe hoṱhe. Ṅwaha muṅwe na muṅwe, khonani dzawe dzo vha dzi tshi ya u mu dalela ngei Silo.