LEKSYON 36
An Saad ni Jepte
An mga Israelita binaya na liwat kan Jehova ngan nagsingba ha buwa nga mga dios. Han gin-atake hira han mga Amonitanhon, waray nahimo iton buwa nga mga dios basi buligan hira. Nag-antos an mga Israelita hin damu ka tuig. Ha urhi, nagsiring hira kan Jehova: ‘Nakasala kami. Alayon, talwasa kami ha amon mga kaaway.’ Ginbungkag han mga Israelita an ira mga dios-dios ngan nagtikang utro pagsingba kan Jehova. Diri karuyag ni Jehova nga padayon hira nga mag-antos.
An girriro nga hi Jepte an ginpili ni Jehova basi manguna ha mga Israelita ha pakig-away ha mga Amonitanhon. Nagsiring hiya kan Jehova: ‘Kon buligan mo kami nga magdaog hini nga girra, nagsasaad ako nga ihahatag ko ha imo an siyahan nga tawo nga magawas ha akon balay ha pagtapo ha akon pag-uli ko.’ Ginpamatian ni Jehova an pag-ampo ni Jepte ngan ginbuligan hiya nga magdaog.
Pag-uli ni Jepte, an siyahan nga tumapo ha iya amo an iya anak nga babaye, an iya nag-uusahan la nga anak. Nagsisinayaw an iya anak samtang nagtutokar hin tamborin. Ano an hihimoon ni Jepte? Nahinumdoman niya an iya saad ngan nagsiring: ‘Agidaw, anak ko! Ginpasubo mo gud an akon kasingkasing. Nagsaad ako kan Jehova. Basi matuman ito, kinahanglan ko ikaw pakadtoon ha tabernakulo ha Shilo basi mag-alagad didto.’ Pero nagsiring an iya anak: ‘Tay, kon nagsaad ka kan Jehova, kinahanglan tumanon mo ito. Tagi la ako hin duha ka bulan basi makaupod ko ha kabukiran an akon kasangkayan nga kababayin-an. Katapos, makadto na ako.’ An anak ni Jepte matinumanon nga nag-alagad ha tabernakulo ha iya bug-os nga kinabuhi. Kada tuig, ginbibisita hiya ha Shilo han iya kasangkayan.
“An mas nagpapalangga ha anak nga lalaki o anak nga babaye kay ha akon diri takos ha akon.”—Mateo 10:37