Le israelitaʼoboʼ tu kaʼa tuʼubsoʼob Jéeobaeʼ ka joʼopʼ u adorartikoʼob maʼ jaajil diosoʼobiʼ. Chéen baʼaleʼ maʼ kanáantaʼaboʼob tumen le diosoʼob ku adorartikoʼob le ka taal baʼateltbiloʼob tumen u kajnáaliloʼob Ammonoʼ. Bey úuchik u muʼyaj le israelitaʼob ich yaʼab añosoʼ. Le oʼolaleʼ tu yaʼaloʼob tiʼ Jéeoba: ‹Tsʼoʼok k-kʼebantal. Beet uts a salvarkoʼon tiʼ le máaxoʼob pʼekmiloʼonoʼ›. Le israelitaʼob túunoʼ tu xuʼulsoʼob le maʼ jaajil diosoʼoboʼ ka joʼopʼ u kaʼa adorartikoʼob Jéeoba. Letiʼ túuneʼ maʼ páajchaj u seguer u yilik bix u muʼyajoʼobiʼ.

Le israelitaʼoboʼ tu yéeyoʼob juntúul soldado ku kʼaabaʼtik Jefté. Letiʼ kaʼach kun nuʼuktikoʼob ken xiʼikoʼob baʼateʼel yéetel le ammonitaʼoboʼ. Jefteeʼ tu yaʼalaj tiʼ Jéeoba: ‹Wa ka wáantkoʼon k-ganart le baʼatelaʼ, yaan in kʼubik tiʼ teech le yáax máax kun jóokʼol  kʼamken tin wotoch le ken suunakenoʼ›. Jéeobaeʼ tu yuʼubaj le baʼax tu kʼáataj Jefteoʼ ka tu yáantaj u ganart le baʼateloʼ.

Ka suunaj Jefté tu yotocheʼ, le máax yáax jóokʼ kʼamkoʼ u juntúuliliʼ hija. Le ka jóokʼeʼ táan u yóokʼot yéetel táan u paxik u pandereta. ¿Baʼax túun ken u beet Jefté beoraaʼ? Kʼaʼajtiʼ le baʼax u yaʼalmaj tiʼ Jéeobaoʼ, ka tu yaʼalaj: ‹¡Ay hija! Tsʼoʼok a beetik u yaatal u yóol in puksiʼikʼal. Tin beetaj junpʼéel promesa tiʼ Jéeoba, utiaʼal u béeytaleʼ kʼaʼabéet in túuxtikech meyaj teʼ tabernáculo yaan Silooʼ›. U hija túuneʼ tu yaʼalajtiʼ: ‹Papi, wa letiʼe baʼax ta waʼalaj tiʼ Jéeobaoʼ kʼaʼabéet a béeykuntik. Chéen baʼax kin kʼáatiktecheʼ ka a chaʼa in bin kaʼapʼéel mes yéetel in amigaʼob teʼ puʼukoʼoboʼ. Ken tsʼoʼokkeʼ kin bin teʼ tabernaculooʼ›. U hija Jefteeʼ chúukpaj u yóol yéetel meyajnaj teʼ tabernáculo ichil tuláakal u kuxtaloʼ. U amigaʼobeʼ cada año ku bin kaʼach u xíimbaltoʼob tu kaajil Siló.