Eli ma Jalam ma dit ubino kud awiya ma co ario; nying’ nyathin ne acel ubino Hofni ma kucelo ke Finehaz. Gin ario zoo gibino julam i hema. Gibed giworo ngo cik pa Yehova man gibed gisendo dhanu mi tuko ngo. Ka nyithindho mir Israel gibino thiero lam ni Yehova, Hofni giku Finehaz giting’o unding’ ring’o ma beco igi. Eli uwinjo pi lembe m’awiya pare gibetimo, re ekwerogi ngo. Nyo Yehova uweko gimediri ku timo maeno?

Kadok Samwel ubino nyathin ni Hofni giku Finehaz de, re elubo ngo timo migi. Mutoro ubed unego Yehova i kum Samwel. Nindo acel kinde ma Samwel unindo, ewinjo dwal moko ubelwong’e. E eai eringo i bang’ Eli, man eyero kumae: ‘Anuti!’ Eli uwacu ire kumae: ‘Alwong’i ngo. Dok inindi.’ Samwel udok uvuto. I ng’eye dwalne ulwong’e kendo. Kinde ma Samwel uwinjo dwal maeno wang’ mir adege, Eli unyang’ nia Yehova re m’ubelwong’o Samwel. E eyero ni Samwel nia ka dwalne ulwong’e kendo, ewac kumae: ‘Yer, Yehova. Jatic peri ubewinjo.’

Samwel udok uvuto. I ng’eye, ewinjo dwal m’ubelwong’e kumae: ‘Samwel! Samwel!’ Edwoko kumae: ‘Yer, jatic peri  ubewinjo.’ Yehova uyero ire kumae: ‘Wac ni Eli nia abecimio ire matira man ni juruot pare. Eng’eyo ma ber nia awiya pare ubetimo lembe ma reco i hema para, re ekwerogi ngo.’ Urwone kugweno, Samwel uyabu dhugola mi hema calu m’ebed etimo nja. Ento lworo bino nege nikoro lembe ma Yehova uyero ni jalam ma dit. E Eli ulwong’e man epenje kumae: ‘Woda, Yehova uyero ang’o iri? Kor ira lembe ceke.’ Samwel ugam ukoro lembene ceke ni Eli.

Kinde ma Samwel ubedongo, Yehova umedere nitelo wie. Dhanu mi tung’ ng’om mir Israel ceke ging’eyo nia Yehova ung’io Samwel ubed jabila man japoklembe.