Sarakalasebagaw kuntigiba Eli tun be ni dencɛ fila ye. U tun ye sarakalasebagaw ye fanibugu kɔnɔ. U tɔgɔw ko Ofini ani Fineyasi. U tun tɛ Jehova ka sariyaw labato ani u tun tɛ mɔgɔw minɛ ka ɲɛ. Ni Israɛldenw tun nana saraka bɔ Jehova ye, Ofini ni Fineyasi tun be sogo ɲanamanw woloma u yɛrɛw ye. Eli dencɛw tun be min kɛra, a y’o mɛn, nka a ma foyi kɛ. Yala Jehova tun bena o koo to ten wa?

Hali ni Ofini ni Fineyasi tun ka kɔrɔ Samuyɛli ye kosɔbɛ, Samuyɛli m’u ladegi. Samuyɛli koo tun ka di Jehova ye. Loon dɔ sufɛ, ka Samuyɛli to sinɔgɔ la, a y’a mɛn dɔ b’a weelela. A panna ka wuli ka boli ka taga a fɔ Eli ye ko: ‘Ne ye nin ye.’ Nka Eli ko: ‘Ne ma i weele. Segi ka taga la.’ Samuyɛli segira ka taga la. O kɔ, a y’a tɔgɔ mɛn tugun. Tuma min na Samuyɛli y’o welekan mɛn a siɲɛ sabanan na, Eli y’a faamu ko Jehova lo tun be Samuyɛli weelela. A y’a fɔ Samuyɛli ye ko n’a y’o welekan mɛn tugun, a k’a fɔ ko: ‘Jehova, kuma, i ka jɔncɛ be mɛnni kɛra.’

Samuyɛli kɔsegira ka taga la. O kɔ a y’a mɛn ko: ‘Samuyɛli! Samuyɛli!’ A ko: ‘Kuma, i ka jɔncɛ be mɛnni kɛra.’ Jehova y’a fɔ  a ye ko: ‘A fɔ Eli ye ko ne bena ale n’a somɔgɔw ɲangi. A b’a lɔn ko a deenw be kojuguw kɛra ne ka fanibugu kɔnɔ, nka a tɛ foyi kɛra o kosɔn.’ O loon dugusagwɛ, Samuyɛli ye fanibugu daaw yɛlɛ i ko a tun be deli k’a kɛ cogo min na. Jehova ko a ka min fɔ sarakalasebagaw kuntigiba ye, a tun be siranna k’o fɔ. Nka Eli y’a weele k’a ɲininga ko: ‘Ne dencɛ, Jehova ye mun lo fɔ i ye do? A bɛɛ lakali ne ye.’ Samuyɛli y’o koow bɛɛ lakali a ye.

Samuyɛli bonyatɔ, Jehova tora ka kɛ n’a ye. K’a ta jamana faan kelen na ka taga a bila faan dɔ la, Israɛldenw bɛɛ y’a lɔn ko Jehova ye Samuyɛli lo sugandi a ka kɛ kira ni kititigɛla ye.