Eli, ũrĩa warĩ mũthĩnjĩri-Ngai mũnene, nĩ aarĩ na ariũ eerĩ arĩa maatungataga nyũmba-inĩ ya Jehova marĩ athĩnjĩri-Ngai. Meetagwo Hofini na Finehasi. Matiathĩkagĩra mawatho ma Jehova na meekaga andũ maũndũ moru mũno. Aisiraeli mathiĩ kũrutĩra Jehova magongona, Hofini na Finehasi maathiaga makoya nyama iria njega. Eli nĩ aaiguaga ũrĩa ariũ ake meekaga, no gũtirĩ ikinya oyaga. Hihi Jehova nĩ angĩarekire ũndũ ũcio ũthiĩ na mbere gwĩkĩka?

O na gũtuĩka Samueli aarĩ mũnini gũkĩra Hofini na Finehasi, ndeekaga tao. Jehova nĩ aakenagio mũno nĩ Samueli. Mũthenya ũmwe Samueli arĩ toro, nĩ aaiguire etwo. Okĩrire agĩteng’era kũrĩ Eli na akĩmwĩra: ‘Ĩ niĩ ũyũ!’ No Eli aamwĩrire: ‘Niĩ ndigwĩtĩte. Coka toro.’ Samueli nĩ aacokire toro, ĩndĩ nĩ aaiguire etwo rĩngĩ. Rĩrĩa Samueli eetirũo rita rĩa gatatũ, Eli nĩ aamenyire atĩ nĩ Jehova wamwĩtaga. Aamwĩrire atĩ etwo rĩngĩ oige ũũ: ‘Aria, Jehova. Nĩ gũkorũo ndungata yaku nĩ ĩgũthikĩrĩirie.’

Samueli nĩ aacokire toro o rĩngĩ. Aacokire akĩigua gũgĩtanwo: ‘Samueli! Samueli!’ Nake agĩcokia: ‘Aria tondũ ndungata yaku nĩ ĩgũthikĩrĩirie.’ Jehova aamwĩrire ũũ: ‘Ĩra Eli atĩ nĩ ngũmũherithia  hamwe na famĩlĩ yake. Nĩ oĩ atĩ ariũ ake mekaga maũndũ moru nyũmba-inĩ yakwa, no gũtirĩ ikinya oyaga.’ Mũthenya ũyũ ũngĩ rũcinĩ, Samueli nĩ aahingũrire mĩrango ya nyũmba ya Jehova o ta ũrĩa aamenyerete. Nĩ eetigĩraga kwĩra Eli ũrĩa Jehova aamwĩrĩte. No Eli nĩ aamwĩtire na akĩmũũria ũũ: ‘Samueli, nĩ atĩa Jehova arakwĩrire? Njĩĩra na ndũkahithe.’ Nĩ ũndũ ũcio, Samueli nĩ eerire Eli ũrĩa wothe eerĩtwo.

O ũrĩa Samueli aakũraga, Jehova nĩ aamũteithagia. Bũrũri-inĩ wothe gũtirĩ Mũisiraeli o na ũmwe ũtaamenyire atĩ Jehova nĩ aathuurĩte Samueli atuĩke mũnabii na mũtuanĩri cira.