Mupristeli gomunene Eli, kwa kere novana vavali wovagara ava va kere vapristeli ponkongoronzugo. Madina gawo, Hofini naPinehasa. Awo kapi va limburukwire noveta daJehova, ntani ngava tekura vantu momudona. Apa Vaisraeli ngava reta nonzambo kwaJehova, Hofini naPinehasa ngava ligusire vene nyama zongwa po. Eli ga yi zuvhire eyi ngava rugana vana vendi, nye kwato eyi ga rugene ko. Jehova kuvhura a sigilire yininke yangoso yi twikire kuhoroka ndi?

Nampili ngomu Samwere ga kere munona, kapi ga kweme sihonena saHofini naPinehasa. Jehova kwa haferere Samwere. Masiku gamwe apa ga rere, Samwere ta zuvhu ezwi lina kumuzigida. Makura ta pinduka a dukire kwaEli nokutanta asi: ‘Nyame ogu muna zigida!’ Nye Eli ta limburura asi: ‘Kapi nina kuzigida. Zende o ka rare.’ Samwere makura ta tengura a ka rare. Tayi horoka hena. Apa Samwere ga zuvhire ezwi sikando sautatu, Eli ta dimburura asi Jehova yige ga zigidire Samwere. Eli ta tantere Samwere asi nsene no ka zuvha hena ezwi lina kukuzigida, ka uyunge asi: ‘Uyunga, Jehova. Mukareli goge ta purakene.’

Samwere ta tengura hena a ka rare. Ta zuvhu ezwi asi: ‘Samwere!  Samwere!’ Ta limburura asi: ‘Uyunga, mukareli goge ta purakene.’ Jehova ta tantere Samwere asi: ‘Tantera Eli asi ngani mu tengeka nepata lyendi. Age ga diva asi vana vendi kurugana udona monkongoronzugo, nye kwato eyi a rugana ko.’ Ezuva lyokukwama ko, Samwere ta zegurura mavero gonkongoronzugo, ngamoomu a yi rugana nkenye apa. Age kwa tjilire kutantera mupristeli gomunene kweyi ga uyungire Jehova. Nye Eli ta zigida Samwere nokumupura asi: ‘Munwange, nonkango musinke ana ku tantere Jehova? Di tantera nge nadinye.’ Makura Samwere ta tantere Eli nayinye.

Ngomu ga kulire Samwere, Jehova kwa kere pwendi. Mosirongo nasinye, Vaisraeli tava diva asi Jehova ga horowora Samwere a kare muporofete nomupanguli.