O prvosveštenik, o Ilije, hine lje duj čhave kola služindže ko sveto šator sar sveštenikija. Oljenge nava hine Ofnije hem Fines. On na šundže e Jehovase zapovestija hem but lošno ponašindže pe e narodoja. Ked o Izraelcija andže žrtve e Jehovase, o Ofnije hem o Fines ljelje pese o najšukar deo kotar mas. O Ilije šundža so čerdže oljese čhave, ama ništa na čerdža. Da li o Jehova ka mukhel odola buča adžahar te ačhon?

O Samuilo hine but poterno ando Ofnije hem ando Fines, ama na dželo palo oljengo primer. O Jehova hine but zadovoljno e Samuileja. Jekh rat, dži o Samuilo suča, šundža sar neko vičini lje ko nav. Uštilo, prastandilo ko Ilije hem phendža ljese: „Akate hijum!“ O Ilije phendža ljese: „Me na vičindžum tut. Irin tut te sove.“ O Samuilo irindža pe te sovel, ama paljem šundža odova glaso. Ked o Samuilo šundža hem o trito puti isto glaso, o Ilije haljilo so o Jehova tano odova so vičini lje. Tegani, ov vačerdža e Samuilese ked ka šunel paljem odova glaso, te phenel: „Vačer Jehova. To sluga šunela tut.“

O Samuilo irindža pe paljem te pašljol. Tegani, šundža sar o glaso vičini: „Samuilo! Samuilo!“ Ov odgovorindža: „Vačer  Jehova. To sluga šunela tut.“ O Jehova phendža ljese: „Phen e Ilijese so ka kazninav olje hem oljese porodica. Ov džanela so oljese čhave čerena lošna buča ko moklo šator, ama ništa na čerela.“ Sabalje, o Samuilo phravdža o udar ando šator, sar so uvek čerdža odova. Ov darandilo te phenel e prvosveštenikose odova so vačerdža ljese o Jehova. Ama, o Ilije vičindža lje hem pučlja lje: „Mo čhavo, so phendža tuče o Jehova? Phen maje sa.“ Tegani o Samuilo vačerdža oljese sa so vačerdža ljese o Jehova.

Dži barilo o Samuilo, o Jehova celo vreme hine oljeja. Ko celo Izrael sare džandže so o Jehova birindža e Samuile te ovel prorok hem sudija.