Tshifhe muhulu Eli o vha e na vhana vhavhili vha vhatukana vhe vha vha vhe vhotshifhe thebenekeleni. Madzina avho ndi Hofuni na Pinehasi. A vho ngo thetshelesa milayo ya Yehova nahone vha fara vhathu nga nḓila i si yavhuḓi. Musi Vhaisiraele vha tshi ḓisa zwiṱhavhelo zwa Yehova, Hofuni na Pinehasi vho vha vha tshi dzhia ṋama yavhuḓi. Eli a pfa nga zwe vhana vhawe vha vha vha khou zwi ita, fhedzi a sa vha kaidze. Naa Yehova o vha a tshi ḓo tendela zwenezwi zwi tshi bvela phanḓa?

Naho Samuele o vha e muṱuku vhukuma kha Hofuni na Pinehasi, ho ngo tevhela tsumbo yavho. Yehova o takadzwa nga Samuele. Ḽiṅwe ḓuvha musi o eḓela, Samuele a pfa ipfi ḽi tshi khou mu vhidza. A vuwa nahone a gidimela kha Eli, a ri: ‘Ndi fhano.’ Fhedzi Eli a ri: ‘A tho ngo ni vhidza. Vhuyelelani ni yo eḓela.’ Samuele a dovha a yo eḓela. A dovha a vhidzelelwa. Musi a tshi dovha a pfa ipfi lwa vhuraru, Eli a zwi ḓivha uri ndi Yehova we a vha a tshi khou vhidza Samuele. A vhudza Samuele uri arali a dovha a pfa ḽeneḽo ipfi, u fanela uri: ‘Amba, Yehova. Mushumeli wau o thetshelesa.’

Samuele a vhuyelela u eḓela. Nga murahu a pfa hu tshi pfi: ‘Samuele! Samuele!’ A fhindula a ri: ‘Amba, mushumeli wau o  thetshelesa.’ Yehova a mu vhudza a ri: ‘Vhudzani Eli uri ndi ḓo mu pfisa vhuṱungu na muṱa wawe. U a zwi ḓivha uri vhana vhawe vha khou ita zwo vhifhaho thebenekeleni yanga, fhedzi ha vha kaidzi.’ Nga matsheloni Samuele a vula miṋango ya u dzhena thebenekeleni, samusi a tshi ita nga u ralo tshifhinga tshoṱhe. O vha a tshi khou ofha u vhudza tshifhe muhulu zwe Yehova a amba. Fhedzi Eli a mu vhidza nahone a mu vhudzisa a ri: ‘Ṅwananga, Yehova o ni vhudza mini? Mmbudzeni zwoṱhe.’ Ngauralo, Samuele a vhudza Eli zwoṱhe.

Musi Samuele a tshi khou aluwa, Yehova o mu tikedza. Shangoni ḽoṱhe, Vhaisiraele vhoṱhe vha ḓivha uri Yehova o khetha Samuele uri a vhe muporofita na muhaṱuli.