Nyithindho ma pol mir Israel gicaku woro ayi gin m’acwia kendo, e Yehova uwenjogi i cing’ Jufilisti. Ento Juisrael moko bino nuti ma gimaru Yehova. Acel m’i kindgi ubino Manoa. Manoa giku min ot pare ginyolo ngo awiya. Nindo moko, Yehova uoro malaika pare i bang’ dhaku pa Manoa. Malaikane uyero ire kumae: ‘Ibinyolo nyathin ma nico. Ebibodho nyithindho mir Israel kud i cing Jufilisti. Nyathin ne bibedo Janaziri.’ Nyo, ing’eyo nia Junaziri gibino jukani? Gibino dhanu moko ma Yehova ung’iogi segi pi nitimo ire. Junaziri gibed ginyaru ngo yuk wigi.

I ng’eye, nyathin ne unyolere man Manoa ucaku nyinge Samson. Kinde ma Samson ubedongo, Yehova umio ire tego lee mandha. Ebino ku copo mi nego umvor ku cinge. Nindo acel, Samson unego Jufilisti 30 zoo eni kende. Jufilisti gigam gidage lee man gicaku sayu ayi ma gicopo nege ko. Nindo moko kud uthieno, saa ma Samson ubenindo i adhura mi Gaza, gibino i dhugang’ mir adhurane pi nikure kara ginege kugweno. Ento i diewor ma ling’, Samson ucidho i dhugang’ mir adhura, man emugo dhugola gang’ne cen. Ebielo dhugolane iwi goke ewotho ko nitundo iwi got moko ceng’ini ku Hebron!

I ng’eye, Jufilisti gicidho i bang’ Delila ma tie nyaku ma Samson umito gamu, man giwacu ire kumae: ‘Kan ibidhe enyutho iri gin m’uketho etie ku tego, wabimio iri sente mi mola ma tar elufu abic ku dak abic. Wamito wamake man wabole i prizo.’ Calu Delila umaru sente, egam eyio lembe maeno. Ku kwong’a Samson ukwero ninyutho ire nia pirang’o etie ku tego ma lee. Ento erere asu nitundo etuco ire lembe mi cwinye. Samson uyero ire kumae: ‘Niai con junyaru ngo wia pilembe atie Janaziri. Ka junyaru wia ci, tego para bithum.’ M’umbe jiji, Samson utimo kosa ma lee dit nituco ire lembe mi cwinye.

Ndhundhu eca, Delila uyero ni Jufilisti kumae: ‘Ang’eyo gin m’uketho etie ku tego!’ Eketho Samson unindo iwi bambe, man  ekwayu ng’atu moko unyaru yuk wie. Saa ma junyaru yuk wie thum, Delila ukok kumae: ‘Samson, Jufilisti ucoro i wii!’ E Samson uai malu, ento tego pare thum. Jufilisti gimake, giloyo wang’e man gibole i prizo.

Nindo acel, Jufilisti elufu swa gicokiri i hekalu pa Dagon ma tie mungu m’araga migi, man gikok kumae: ‘Mungu mwa umio Samson i cingwa! Wucigam Samson kud i prizo! Wukele ebin esemb iwa sosi.’ Gikethe ecungo i kind mbegi ario mi ot, man ginyware. Samson ukwayu Yehova kumae: ‘E Yehova akweyi, mii ira tego kendo wang’ acel maeni kende.’ Saa maeno nwang’u yuk wi Samson udongo. Ecwalu mbegi mir hekalu ku tego pare zoo, e hekalune rwombere; dhanu ceke m’ubino i ie githo man Samson de utho.