Ngandak bon ba Israel i bi témb bôdôl bégés bisat, jon Yéhôva a bi nwas le Lôk Filistia i bémbe loñ yap. Ndi ngim bon ba Israel ipe i bé gwés Yéhôva. Wada a ba mu le Manôa. Bona nwaa ba bééna bé bon. Kel yada, Yéhôva a om añgel yak nwaa Manôa. Añgel i kal nye le: ‘W’a bana man munlôm. Nyen a’ tohol Israel i moo ma bôt ba Filistia. A ga ba mut Nazir.’ Baa u nyi bonjee ba bé bôt ba Nazir? Ba bé bagwélél batôbôtôbô ba Yéhôva. Bôt ba Nazir ba bééna bé kunde i kit tjôñ tjap.

Mbus ngéda, man Manôa a gwéé, a o nye le Samsôn. Ngéda Samsôn a bi nañ, Yéhôva a ti nye ngui ngandak. Ni moo mé motama, a bé le a nol njéé. Kel yada, Samsôn a nol 30 ma bon ba Filistia nyetama. Lôk Filistia i bé oo nye, i yéñék manjel i nol nye. U wada i Gaza, ngéda Samsôn a bé ke ’ilo, ba ke i nwemel nkoñ, ba bem letee kel i ye inyu nol nye. Ndi i ñem u, Samsôn a telep, a nup manwemel ma nkoñ. A kés mo bituu, a kena mo letee ni libabat li hikôa hi yé bebee ni Hébrôn!

Ndi mbus, bôt ba Filistia ba ke yak Délila, liwanda li muda li Samsôn, ba kal nye le: ‘D’a ti we dikôô di bipes bi silba, ibale u nléba inyuki Samsôn a gwé ngui hala. Di ngwés gwel nye inyu ha nye i mok.’ Kiki Délila a bé gwés moni, a neebe. Ndi ngélé bisu, Samsôn a bi top bé kal nye inyuki a gwé ngui hala. Ndi Délila a bi tééñga nye letee Samsôn a kal nye hee ngui yé i nlôl. A kal le: ‘Ba mah bé kit me tjôñ inyule me yé mut Nazir. Ibale ba nkit me tjôñ, m’a nimis ngui yem.’ Baa u nhoñol bé le Samsôn a bi boñ soso hihôha ngéda a kal nye hala?

Délila a hoo ke ngwéé i kal Lôk Filistia le: ‘Me nyi hee ngui yé i nlôl!’ A kis Samsôn ’ilo, a sébél ki mut, ba homb nye ño. Ndi Délila a lond: ‘A Samsôn, bôt ba Filistia ba yé ha!’ Samsôn a  tôde bañ, a nôgda le ngui yé i mal. Bôt ba Filistia ba gwel nye, ba tôp nye mis, ba leñ nye mok.

Kel yada, dikôô di bôt di Lôk Filistia di kodba i témpel i djob jap le Dagon, di konok maséé, di kalak le: ‘Nyambe wés a bi ti bés Samsôn! Pémhana Samsôn hana! Le a nôlha bés.’ Ba téé nye ipôla mél ima ma ndap, ba nolok nye hiol. Ha nyen Samsôn a lôndôl Yéhôva, a kal le: ‘A Yéhôva, soho ti me ngui ndik inyu ini ngélé yada yotama.’ Ha ngéda i, tjôñ di Samsôn di ma bôdôl o. A nyuge mél ma témpel ni ngui yé yosôna. Ndap i kwél bôt bobasôna ba ba mukété, ba wo, yak Samsôn.