Ala godang halak Israel na manomba patung, dipasombu Jahowa ma halak Palistim mangarajai nasida. Alai adong do halak Israel na torus manomba Jahowa. Sada sian i, i ma si Manoa. Ndang adong anakna. Di sada tingki, disuru Jahowa ma suru-suruan manang malaikat manjumpangi istrina. Didok suru-suruan i ma, ‘Satongkin nai, adong nama anakmu. Ibana ma na paluahon bangso Israel sian halak Palistim. Gabe halak Nasir ma ibana.’ Diboto ho do lapatanna gabe halak Nasir? Halak Nasir lapatanna halak na mandapot tugas na ringkot sian Debata. Alai ndang boi dipangkas obuk ni nasida.

Dapot ma tingkina, tubu ma anak ni si Manoa. Dibahen ma goarna si Simson. Dung lam magodang, dilehon Jahowa ma gogo tu ibana. Boi do dipamate ibana singa. Hea do dibunu ibana 30 halak Palistim. Gabe sogo ma roha ni halak Palistim jala naeng dipamate ma ibana. Sada tingki, marborngin ma ibana di Gaza. Ro ma halak Palistim marpungu di gerbang ni kota i. Dipaima nasida ma sahat tu manogot laho pamatehon si Simson. Alai di tonga borngin, dungo ma si Simson. Laho ma ibana tu gerbang ni kota i. Dicabut ma gerbang i jala diangkat. Diboan ibana ma i tu punsu ni dolok di jonok ni huta Hebron!

Di sada tingki, ro ma halak Palistim tu si Delila, hallet ni si Simson. Didok ma tu si Delila, ‘Dilehon hami ma tu ho godang hepeng molo boi diboto ho boasa gogo si Simson i. Naeng dipenjarahon hami do ibana.’ Lomo do roha ni si Delila asa godang hepengna. Alani i, dioloi ibana ma nasida. Di mulana, ndang olo si Simson paboahon boasa mansai gogo ibana. Alai sai torus do disungkuni si Delila ibana. Ujungna didok si Simson ma, ‘Ndang hea dipangkas obukku ala halak Nasir do ahu. Molo dipangkas obukku, gabe ndang margogo be ahu.’ Sala do si Simson paboahon i kan?

Dung i didok si Delila ma tu halak Palistim, ‘Nunga huboto be rahasiana!’ Tingki modom si Simson di abinganna, disuru ma halak  mamangkas obukna. Dung i, gogo ma soara ni si Delila mandok, ‘Simson, nunga ro halak Palistim!’ Dungo ma si Simson, alai ndang margogo be ibana. Ditangkup halak Palistim ma ibana, dipapitung, jala dipenjarahon.

Di sada tingki, marpungu ma marribu halak Palistim di sada inganan. Disi do nasida manomba debata ni nasida, i ma Dagon. Didok nasida ma, ‘Nunga dilehon debatanta si Simson tu hita! Boan ma si Simson i tuson! Asa adong siparengkelonta.’ Dipajongjong ma ibana di jonok ni dua tiang ni bangunan i jala sai direhei nasida do ibana. Dung i martangiang ma si Simson. Ninna ma, ‘Ale Jahowa, lehon ma tu ahu gogo sahali on.’ Di tingki i, nunga mulai ganjang obuk ni Simson. Dionjar ibana ma dua tiang i sagogo ni gogona. Marumpak ma bangunan i, mate ma angka halak di inganan i, jala dohot do si Simson mate.