Abena Israele abengi na kabili batampile ukupepa utulubi, e co Yehova alekele abaPelishiti ukulabacusha. Na lyo line kwali abena Israele bamo abatemenwe Yehova. Umo pali aba ni Manoa. Manoa no mukashi wakwe tabakwetepo umwana. Bushiku bumo Yehova atumine malaika ku mukashi wa kwa Manoa. Malaika aebele muka Manoa ati: ‘Ukakwata umwana umwaume. Akapususha abena Israele ku baPelishiti kabili akaba umuNasiri.’ Bushe walibeshiba abaNasiri? AbaNasiri bali babomfi ba kwa Yehova abaibela. Tabalebeya no mushishi.

Mu kupita kwa nshita, umwana wa kwa Manoa umwaume alifyelwe, kabili amwinike ati Samsone. Ilyo Samsone akulile, Yehova alimupeele amaka ayengi. Alipeyepo ne nkalamo ku minwe fye. Inshita imo, Samsone alipeye abaPelishiti 30 eka fye. AbaPelishiti balimupatile sana kabili balefwaya ukumwipaya. Bushiku bumo mu nshita ya bushiku ninshi Samsone nalaala mu musumba wa Gasa, abaPelishiti baile ku mwinshi wa musumba kabili balemulolela pa kuti nga bwaca bamwipaye. Lelo pa kati ka bushiku, Samsone alibuukile, aya na ku mwinshi wa musumba no kunukulapo iciibi. Iciibi icali pa mwinshi wa musumba cali icafina sana kabili cali icikulu. E ico asendele ici ciibi pa kubeya kwakwe mpaka afika pa muulu wa lupili lwa Hebrone!

Pa numa abaPelishiti baile kuli Delila, umwanakashi uo Samsone alefwaya ukuupa, kabili bamwebele abati: ‘Tukakupeela indalama sha silfere ishingi nga watweba ico Samsone akwatila sana amaka. Tulefwaya tukamwikate kabili tukamubike mu cifungo.’ Delila alefwaisha ukukwata indalama e ico alisumine ukucita ifyo bamwebele. Pa kubala, Samsone alekaana ukumweba icalengele akwate sana amaka. Nomba alemupatikisha ukuti amwebe ica kuti alifililwe ukumufisa, e ico Samsone asukile amweba icishinka. Atile: ‘Ukufuma apo nafyalilwa, nshabala beyapo umushishi wandi pantu  ndi mu Nasiri. Nga bambeya umushishi, amaka kuti yapwa.’ Bushe ulemona ukuti Samsone alicitile fye bwino ukweba Delila icishinka?

Delila apo pene fye aile ku baPelishiti no kubeba ati: ‘Nanjeba!’ Delila alengele Samsone alaala utulo pa molu yakwe e lyo aeba uwakumubeya umushishi. E lyo Delila apunda ati: ‘Samsone, abaPelishiti baisa!’ Samsone alibukile lelo amaka ninshi nayapwa. AbaPelishiti balimwikete, bamulobola amenso e lyo bamubika mu cifungo.

Bushiku bumo abaPelishiti abengi bali mwi tempele lya kwa lesa wabo Dagone, balepunda abati: ‘Lesa wesu natupeela Samsone! Leteni Samsone kuno! Muleteni ese atusansamusheko.’ E ico bamwiminike pa kati ka nceshi shibili ninshi balemuseka. Samsone alilile ati: ‘Mwe Yehova, napapaata mpeeleni amaka uno wine fye umuku.’ Pali iyi nshita ninshi umushishi wa kwa Samsone walimena. Asunkile inceshi shibili ishe tempele na maka yakwe yonse. Itempele lyawilile bonse abalimo kabili bonse balifwile kumo fye na Samsone.