Melala kalak Israel ngulihi ka nembah man berhala, emaka ipediat Jahwe kalak Pilisti erkuasa i taneh kalak Israel. Tapi lit kalak si ngkelengi Jahwe eme Manoah. Ia ras diberuna la lit anakna. Bas sada wari, isuruh Jahwe malekatNa ngerana man diberu Manoah. Nina malekat e man bana, ‘Kentisik nari lit me anakndu. Ia me si ngelindungi Israel arah kalak Pilisti. Jadi kalak Nasir me ia pagi.’ Tehndu nge kai ertina Nasir? Enda ertina kalak si ikhususken ngelayani Jahwe. Sekalak Nasir la banci ipangkasna bukna.

Dungna, lahir me anak Manoah janah ibanna gelarna Simson. Sanga Simson reh galangna, iban Jahwe ia megegeh kel. Banci ibunuhna singa alu tanna. Pernah ka ibunuh Simson 30 kalak Pilisti. Emaka segat kel ate kalak Pilisti man Simson, janah idarami kalak e cara guna munuh ia. Bas sada berngi tunduh Simson i kuta Gasa, i je itimai kalak Pilisti ia i gerbang kota gelah sanga erpagi-pagi banci ibunuhna Simson. Tapi bas tengah berngi, medak Simson, lawes ia ku gerbang kota, nce icabutna gerbang e. Tamana ku gurungna ras babana ku datas gunung i deher kuta Hebron!

Kenca si e, jumpai kalak Pilisti rondong Simson eme Delila. Nina kalak e man Delila, ‘Ibere kami kam seribu keping pirak adi katakenndu man kami kai si erban Simson seh kel gegehna. Ipenjaraken kami ate kami ia.’ Setuju Delila perban merhat kel ia ndatken sen e. Tangtangna, la nggit Simson ngatakenca ngkai maka ia megegeh. Tapi ban lalap itami-tami Delila, dungna, ikatakenna rahasiana. Nina man diberu e, ‘Bukku enda la pernah ipangkas perban aku kalak Nasir. Adi ipangkas bukku, pasti lanai aku megegeh.’ Nggo salah kel Simson perban ikatakenna rahasiana man diberu e.

 Emaka mis ikataken Delila man kalak Pilisti, ‘Nggo kueteh rahasiana!’ Nce, ibanna Simson tunduh i ampunna, kenca si e, isuruhna kalak si deban mangkas buk Simson. Nce, serko Delila nina, ‘Simson, nggo reh kalak Pilisti!’ Sengget kel Simson, janah gegehna pe bene. Itangkap kalak Pilisti ia, ibutakenna Simson ras imasukkenna ku penjara.

Bas sada wari, iban kalak Pilisti sada perayan guna nembah dibata kalak Pilisti eme Dagon. Nina kalak e ersurak, ‘Dibatanta nggo mereken Simson man banta! Baba Simson kudarat! Gelah erguro-guro kita ras ia.’ Iiket kalak e Simson i dua tiang ras itokohi kalak e ia. Emaka ertoto Simson nina, ‘O Jahwe, bereken min gegehku sekali nari lah gia.’ Sanga si e, buk Simson nggo turah mulihi. Isorongna tiang e alu kerina gegehna. Runtuh me bangunen e janah kerina kalak si lit i je mate, bage pe Simson.