Bon b’Israël abui be nga beta taté na ba kañe bengulemelan, ane Yéhôva a nga jô’é na Bephilistin be tame tibili be. Ve b’Israélite béziñ be nga ke ôsu a nye’e Yéhôva. Manoah a mbe môte wua ya été. Ba minga wé be nji be be bili mon. Môs éziñ, Yéhôva a nga lôm éngele wé na, a ke kate minga Manoah foé nyi: ‘Wo zu biaé mona fam. Nnye a ye kôté bon b’Israël mo Bephilistin. Mongô ate a ye bo Naziréen.’ Ye wo yem jôm nalé a tinan? Naziréen a mbe mbo ésaé Yéhôva a mbe ngum aval. É mbe étyi na, môt a ne Naziréen a tyi’i bisile bié.

Ane Manoah ba minga wé be nga biaé mona fam, be yôlé nye na Samson. Nté mon ate a mbe a yaék, Yéhôva a mbe a va’a nye abui ngul. A mbe ngule ya wôé ngbwengbwem a mo mé. Môs éziñ, a nga wôé Bephilistin 300. Ajô te Bephilistin be mbe be vini’i nye, nde be nga taté na ba jeñ avale be ne wôé nye. Alu éziñ, Samson a nga ke bômbô tisone ya Gaza, nde Bephilistin be nga ke yabe nye e mimbé ya tison. Be mbe be jô’ô na, nné ane a ye vam, ba ye bi nye a wôé nye. Ve Samson a nga kôlô si e zañ alu, a ke kui mimbé ya tison, a té mie. Ane a nga beté mimbé mite bitule bié yôp, a kele mie minkôle ya Hébron.

Mvuse ya valé, Bephilistin be nga zu yene Dalila, ébone Samson, a jô nye na: ‘Nge ô volô bia na bi yem vôme ngule Samson é tii, bia ye ve wo abui moné. Bia kômbô bi nye, a futi nye mimbôk.’ Mbôle Dalila a mbe a nye’e moné, nde a nga kañese. Samson a nga taté bene kate nye vôme ngule jé é tii. Ve a mbe a yemete nye môs ôse na a kate nye; nde Samson a nga su’ulane nye kate na: ‘Nté ane me nga bialé, be ngenane te tyi’i ma ésil, amu me ne Naziréen. Nge be tyeñe ma, ma ye jañele ngule jam ése.’ Nga ô lôô na Samson a nga dimine bo?

 Été été, Dalila a nga ke kate Bephilistin na: ‘Me nga yem vôme ngule jé é tii.’ Nde a nga yale Samson ôyo meboñe mé, môt éziñ a taté na a tyi’i nye ésil. Ane a nga loone Samson a jô’ô na: ‘Bephilistin be ne va!’ Ane Samson a nga kôlô si, ve a mbe teke fe ngul. Ane Bephilistin be nga bi nye, be tui nye mis, a futi nye mimbôk.

Môs éziñ, abui Bephilistin é nga tôkane temple Dagon, zambe wop. Be mbe be yôtane na: ‘zambe wongan a veya bia Samson! Za’ané Samson ate va. Bi tame kpwe’ele nye.’ Be nga telé nye zañe mekône mebaé. Ane Samson a nga ye’elane Yéhôva ana: ‘Éngôngol a Yéhôva, kandane ma ve ngul.’ E zu koone na ésile jé é betaya taté na ja yaé. Nde a nga sô’ôlô mekône ya temple a ngule jé ése. Ane temple a nga ku bôte nyul, bese be mane wu, ja’a Samson.