A-Izalele anji yaputuka nawa kuwayila tuzambi a mahuza, kashika Yehova echele hanga A-Filistea ayule chifuchi cho. Alioze, kwapwile amwe A-Izalele waze te akuzanga Yehova. Umwe wa kuli ayo te Manoa. Iye ni mukwo-pwo kakapwile ni ana. Limwe tangwa Yehova yatuma mungelo kuli pwo lia Manoa. Mungelo yamulweza ngwenyi: ‘Kumukapwa ni mwana. Iye makapulwila A-Izalele kuli A-Filistea. Iye makapwa kanazireu.’ Shina unanyingika chize te apwa anazireu? Ayo te tuvumbi twa Yehova alipwila. Anazireu te keshi kuteula kambu.

Kulutwe lia matangwa, mwana wa Manoa yasemuka, yamuvuluka ngwo Samasone. Muze Samasone hakola, Yehova yamupwisa mukwa-tachi jinji. Iye Kahashile kushiha ndumba ni moko. Ha limwe shimbu, Samasone ukawenyi yashiha A-Filistea 30. Ayo yaputuka kumwivwila kole ni kufupa kumushiha. Ha umwe ufuku muze Samasone te anapomba mu Ngaza, A-Filistea yajingilika pito ja mbonge hanga te amushihe ha chimene. Alioze hakachi ka ufuku, Samasone yahinduka, yaya ku pito ya mbonge, yachiza pito ku chikalakala. Yazundula pito yacho ha yipaya, chocho yaya nayo ndo helu lia mulundu wa Heprone!

Kulutwe, A-Filistea yaya kuli kasendo wa Samasone, Ndelila, ni kumulweza ngwo: ‘Mutukwaha tununu a mbongo ja prata nyi mutulweza haze haswama tachi ja Samasone. Tunafupu kumukwata hanga tumuse mu zuwo lia ususu.’ Ndelila kazangile mbongo, chocho yatayiza. Chitangu, Samasone yalituna kumulweza haze te haswama tachi jenyi. Alioze iye yaputuka kumupinjisa, chocho Samasone yamulweza haze te haswama tachi jenyi. Yamulweza ngwenyi: ‘Kambu jami kanda achiza kajiteula mumu nguli kanazireu. Nyi manguteula kambu, tachi jeswe mujinguhwa.’ Samasone kalingile uhenge unene hakumulweza haze te haswama tachi jenyi, nyi ngwami?

 Hohene Ndelila yalweza A-Filistea ngwenyi: ‘Hinanyingika haze haswama tachi jenyi!’ Iye yapombesa Samasone ha molu jenyi, chocho yasanyika umwe mutu yeza ni kumuteula kambu. Mba Ndelila yakololoka ngwenyi: ‘Samasone, A-Filistea hakuwana!’ Samasone yahinduka mu tulo, kakapwile nawa ni tachi. A-Filistea yamukwata, yamukasa, ni kumusa mu zuwo lia ususu.

Ha limwe tangwa, tununu twa A-Filistea yakunguluka mu tembele ya zambi yo Ndagone, ni kwamba ngwo: ‘Kazambi ketu hakunjika Samasone mu moko jetu! Nehenu Samasone hano! Hanga tumuhehese chikehe.’ Ayo yamusa mukachi ka manguji, nawa yaputuka kumukekuna. Samasone yakololoka ngwenyi: ‘Yehova, lisesa ngwehe tachi ha shimbu lino.’ Ha shimbu liacho kambu jenyi te hijakola nawa. Aye yashinjika manguji a tembele ni tachi jenyi jeswe. Tembele yeswe yiyipuzuka, atu eswe waze apwilemo yafwa, ni Samasone neye yafwa.