En kantite Izraelit ti’n rekonmans ador zidol alor, Zeova ti les bann Filisten kontrol zot pei. Me i ti annan serten Izraelit ki ti kontan Zeova. Enn parmi ti Manoa. Li ek son madanm ti napa zanfan. En zour, Zeova ti anvoy en lanz kot madanm Manoa. Sa lanz ti dir li: ‘Ou pou ganny en garson. I pou sov Izrael dan lanmen bann Filisten. I pou vin en Nazireen.’ Ou konnen kisisa bann Nazireen? Zot ti bann serviter spesyal Zeova. Bann Nazireen pa ti ganny drwa koup zot seve.

Apre, garson Manoa ti ne e i ti apel li Sanmson. Ler Sanmson ti grandi, Zeova ti fer li vreman for. I ti kapab touy en lyon zis avek son de lanmen. En fwa, Sanmson ti touy 30 Filisten li tousel. Bann Filisten pa ti kontan li e zot ti rod en fason pour touy li. En zour swar ler Sanmson ti pe dormi Gaza, zot ti al kot baro lavil. Zot ti esper li laba pour ki zot kapab touy li son lannmen bomaten. Me dan milye lannwit, Sanmson ti leve, al kot baro lavil e tir sa baro dan miray. I ti anmenn sa baro lo son zepol ziska anler lo latet en montanny ki ti pros avek Ebronn!

Pli tar, bann Filisten ti al kot Dalila, en fiy ki Sanmson ti kontan e dir li: ‘Nou pou donn ou en kantite pyes larzan si ou demann Sanmson kwa ki fer li sitan for. Nou anvi tyonbo li e met li dan prizon.’ Dalila ti anvi sa larzan, alor i ti dakor. Premye kou Sanmson pa ti oule dir li akoz i ti sitan for. Me Dalila ti kontinyen fatig li ziska ler i ti dir son sekre. Sanmson ti dir li: ‘Mon pa’n zanmen koup mon seve akoz mon en Nazireen. Si mon koup mon seve, mon pou perdi mon lafors.’ Sa ti en gro fot, pa i vre?

Deswit Dalila ti dir bann Filisten: ‘Mon konn son sekre!’ I ti fer Sanmson dormi lo son lazanm e apre i ti fer en dimoun koup  son seve. Apre Dalila ti kriye: ‘Sanmson bann Filisten i la!’ Sanmson ti leve me i ti napa en sou lafors. Bann Filisten ti tyonbo li, zot ti tir son lizye e zot ti met li dan prizon.

En zour, en kantite Filisten ti’n rasanble dan tanp zot bondye Dagon. Zot ti pe kriye: ‘Nou bondye in donn nou Sanmson! Anmenn Sanmson isi e annou anmize.’ Zot ti fer li debout ant de pilye e boufonn li. Sanmson ti kriye: ‘Silvouple Zeova, donn mwan lafors ankor zis en fwa.’ Seve Sanmson ti’n rekonmans pouse. I ti pous sa de pilye avek tou son lafors. Sa batiman antye ti kraze e touy tou dimoun ki ti dan sa tanp, enkli Sanmson.