A bati tibun Iteraera ake a a manga taromaurii naba bouannanti, ngaia are e a kariaia Iehova kaaini Biritia bwa a na tautaekana abaia. Ma iai naba tibun Iteraera tabeman aika tangira Iehova. Temanna i buakoia boni Manoa. Akea natiia Manoa ma buuna. N te bong teuana ao e kanakoa te anera temanna Iehova nakoni buuni Manoa. E taku te anera nakoina: ‘E na reke natim te mwaane. Ao e na kamaiuia tibun Iteraera mairouia kaaini Biritia. E na riki bwa te Natiraite.’ Ko ataia bwa antai taian Natiraite? Bon ana toro Iehova aika okoro, ao a aki kariaiakaki ni korei iraia.

Imwin tabeua te tai ao e a bungiaki natini Manoa te mwaane, ao e aranna bwa Tamton. N ana tai n ikawairake Tamton ao e kakorakoraaki iroun Iehova. E kona n tiringa te raian ni baina. N te tai teuana, e tiringia kaaini Biritia aika 30 ao akea ae e buokia. A riribaia kaaini Biritia ao a teimatoa n kakaaei aanga ake a na tiringnga iai. N te tairiki teuana, ngke e matu Tamton i Kata ao a a nako naakai nakoni mataroan te kaawa n tataningaa otinakona bwa a aonga n tiringnga n te ingabong anne. Ma ngke e a nukanibong, e teirake Tamton ao e kouta mataroan oon te kaawa. Ao e uota te mataroa anne i aon angana nako taubukin te maunga ae uakaan ma Eberon!

Imwina riki, a kawara raon Tamton ae Terira kaaini Biritia ao a taku: ‘Ti na kabooko n te mwane ae rangi ni bati ngkana ko kakaaea bukini korakoran Tamton. Ti kan taua ao ni karinna n te karabuuti.’ E tangira te mwane Terira ngaia are e a kariaia. N te moantai, e rawa Tamton ni kaotia bwa e aera ngkai e rangi ni korakora. Ma e teimatoa neiei n imanonoia bwa e na kaota te bwai ae raba aei. Ngaia are e a taku teuaei nakoina: ‘E tuai mani koreaki irau ibukina bwa te Natiraite ngai. Ngkana e koreaki, e na bua korakorau.’ Tiaki e boni karaoa te kairua ae bubura Tamton ngke e kaota aei?

 E aki tabwara Terira ma e a weteiia naba kaaini Biritia ao e kangai: ‘I a ataa te bwai ae raba aei!’ E kamatunakoa Tamton i aon toaniwaena, ao e wetea temanna bwa e na korea irana. Ao e a takarua naba Terira ni kangai: ‘Tamton, a a roko kaaini Biritia!’ E uti Tamton ao ai akea korakorana. A taua kaaini Biritia ao a autii kanoani matana ao a karinna n te karabuuti.

N te bong teuana ao a botaki kaaini Biritia aika nga ma nga n ana tembora atuaia ae Takon, ao a tatakarua ni kangai: ‘E a tia atuara n anga Tamton nako nanoni baira! Kaotinakoa nakoira Tamton! Ao e na kakukureira.’ A kateia i marenani boua aika uaai, ao a bwainingareia. E a takarua ngkanne Tamton ni kangai: ‘Iehova, taiaoka ma anganai korakorau tii teuana riki te tai.’ E a manga mwarairai iran Tamton n te tai aei. E kabanea korakorana n ineakini bouan te tembora. Ao e bwaka te auti i aoia aomata ni kabane ake n te tembora ao a mate. E boni mate naba Tamton.