Vil Israelite beted wider anderi Götter a. Drum laat Jehova zue, dass d Philischter ihres Land regiered. Es git aber au Israelite, wo Jehova gern hend. Eine heisst Manoach. Er und sini Frau hend kei Chind. Irgendeinisch schickt Jehova en Engel zu de Frau vom Manoach. De Engel seit zu ihre: «Du wirsch en Sohn übercho. Er wird d Israelite vo de Philischter befreie. Und er wird en Nasiräer sii.» Weisch du, was en Nasiräer isch? En Nasiräer isch en bsundrige Diener vo Jehova. Er dörf sini Haar nie abschniide.

Nacheme Ziitli chömmed de Manoach und sini Frau de versprocheni Sohn über, er heisst Simson. Wo de Simson gross isch, macht Jehova ihn extrem starch. Er cha en Löi eifach nume mit sine Händ töte! Einisch tötet er sogar 30 Philischter ganz allei. D Philischter hassed ihn und wend ihn umbringe. Inere Nacht, wo de Simson z Gasa schlaft, göhnd d Philischter zum Stadttor und warted uf ihn. Si wend ihn am Morge umbringe. Um Mitternacht aber staht de Simson uf, lauft zum Stadttor und riissts eifach us de Muur. Er nimmts uf de Buggel und treits de ganz Weg bis zum Gipfel vomene Berg i de Nöchi vo Hebron!

Später göhnd d Philischter zu de Fründin vom Simson, zu de Delila, und säged: «Mir gebed dir 5500 Silberstück, wenn du usefindisch, werum de Simson eso starch isch. Mir wend ihn nämlich fessle und iisperre.» D Delila möcht das Geld unbedingt und isch demit iiverstande. De Simson wett ihre zerscht nid verzelle, wiso dass er eso starch isch. Aber si stürmt eso lang, bis er nachegit und ihre sis Gheimnis verratet: «Mini Haar sind no nie gschnitte worde, wil ich en Nasiräer bin. Wenn mini Haar abgschnitte werded, denn verlür ich all mini Chraft.» Es isch en grosse Fehler, dass er das verzellt, findsch nid au?

Sofort seit d Delila de Philischter: «Ich ha sis Gheimnis usegfunde!» Si wartet bis de Simson uf ihrem Schoss iischlaft und laat ihm d Haar abschniide. Denn rüeft si: «Simson, d Philischter sind da!» Er verwachet und sini Chraft isch weg. D Philischter packed ihn. Si mached, dass er blind wird und rüehred ihn is Gfängnis.

Später versammled sich tuusigi Philischter im Tempel vo ihrem Gott, em Dagon. Si rüefed: «Üse Gott het üs ghulfe gege de Simson z gwünne! Bringed de Simson da here, demit mirs e chli luschtig hend!» Si stelled ihn zwüsche zwei Süüle und lached ihn us. Denn rüeft de Simson: «O Jehova, gib mir doch nume no das einte Mal Chraft!» I de Zwüscheziit sind d Haar vom Simson wider gwachse. Er drückt mit sinere ganze Chraft gege d Süüle vom Tempel und s ganze Huus kracht zäme. Alli, wo im Huus sind, sterbed – au de Simson.