Watta naalii na israeliita oʼttakana nachikuaʼa sünain aʼwaajaa tü maleiwayaasükalüirua. Niyüülajaka Jeʼwaa tü mmakat Israel najapuluʼu na filisteokana. Eejanapajaʼa israeliita aika apüla Jeʼwaa, maʼaka naaʼin Manóah. Machonsat nuʼwayuuse Manóah nümüin. Soʼu wanee kaʼi, nuluwataain Jeʼwaa wanee aapiee süpüla nümüin sümüin tü nuʼwayuusekat Manóah: «Kachoinjatü pia. Chi püchonkai nia chi oʼtteʼerüinjachikai na israeliitakana noulia na filisteokana otta nazareoinjachi nia». ¿Pütüjaa aaʼu jaraliin na wayuu nazareokana? Naya na wayuu nüneekakana Jeʼwaa süpüla wanee aʼyatawaa otta nnojoishii süpüla noʼyoteʼerüin naʼwala.

Jemeyutka mapa nuʼwayuuse Manóah, niʼitaaka nünülia chi joʼuukai Sansón. Miyoʼupa Sansón, katchinshi maʼin nia nutuma Jeʼwaa. ¡Eeshi süpüla nuʼutuin naaʼin wanee wasashi süka najapü! Soʼu wanee kaʼi nuʼuta aaʼinchii 30 Filisteo nümüiwaʼa. Üttüsü naaʼin na filisteokana nünain Sansón otta nachajaain sukuwaʼipa süpüla noʼutuin naaʼin. Soʼu wanee ai, chajachi Sanson atunkuin suluʼu tü mmakat Gaza, oʼunushii na nüʼünüükana sünain aʼatapajaa nia soʼuluʼu tü pueulokot süpüla noʼutuin naaʼin. Nütamaaka Sansón süseʼeruʼupünaa aikat, naapaain supuettoʼuse tü pueulokot jee nülüʼüjaka shia nunuloʼu saaʼumüin wanee uuchi pejesü sünain Hebrón.

Noʼunaka na filisteokana mapa süpüla naashajaain sümaa Dalila, tü nümüraajüinkat Sansón. «Waapeerü pümüin watta saalii nneerü pülaata, püküjale wamüin kasain katchin maʼin atuma Sansón», namaka sümüin. Anasü sümüin Dalila tü namakat na filisteokana sümüin süka keeʼireein saaʼin tü nneetkat. Nnojotsü nüküjeein Sansón sümüin Dalila jamüin katchinka maʼin nia. Ayatüsü Dalila sümaa süsakiijakuʼu sümüin Sansón. «Nnojoyülia oʼyotoonüin taʼwala, süka nazareoin taya, müleka shiʼyotoonüle taʼwala, nnojoleechi katchin taya», nümakalaka sümüin. Mojusü tü naaʼinrakat Sansón süka nüküjain sümüin Dalila tü katchinkalü atuma nia. ¿Jamüsüjaʼa saaʼin pümüin?

Awataamatüsü Dalila eemüin na filisteokana. «Tatüjaaitpa aaʼu kasain wayu katchinka atuma Sansón», sümaka namüin. Sutunkiraka Dalila Sansón otta shikerotiraka wanee wayuu süpüla niʼyotooin tü nuʼwalakat.  «¡Sansón, antüshii na filisteokana!», sümakalaka nümüin. Nüchijiraapa Sansón, matchinsai nia. Nütaʼünaka natuma na filisteokana, nayuʼluin tü noʼukot jee püreesaka nia natuma.

Soʼu wanee kaʼi, jutkatüshii na filisteokana eere naʼwaajüin Dagón, chi namaleiwasekai. «Nia chi wamaleiwasekai aapakai Sansón wajapuluʼu, jüsaaja nia süpüla wemeeʼerainpalain nia», müshii naya sünain naʼwaatüin. Yalajachi Sansón sünain suuʼui tü piichikat, nemeeʼerainpalaka nia na filisteokana. Emiyoʼulaasü süchikuaʼa tü nuʼwalakat. Nuʼwaataka Sansón: «Jeʼwaakalee, katchin taya tachikuaʼa putuma». Nujutaka süchiki süsaʼa tü piichikat. Nujuttiraka tü miichikat, outaleeka napüshuaʼa na yalajanakana suluʼu. Müshia Sansón outüshi nia soʼu tia.