Nitre Israel kwati krubäte namaninta jondron ngwarbe üai sribebare mike ngöböre jai. Aisete Jehovakwe nitre Filisteo tuanimetre juta Israel ye gobraine. Akwa nitre Israel ruäre nämene Jehová tarere, ñodre, Manóah. Niara aune muko kwe yekwe monso ñaka nämene jire. Bati, Jehovakwe ángel juani kukwe ne mike gare Manóah muko ie: ‘Monso rabai mäkwe ye käkwe nitre Israel mikai kwäre nitre filisteo ye kisete. Niara rabai ni nazareo ye kwrere’. ¿Nitre nazareo ye dre gärätä gare mäi? Nitre ye abokän nämene sribi ütiäte nuainne Jehová kräke aune niaratre ñaka rabadre ja dokwä drüen tikekä jire.

Ja känenkäre, Manóah ngobo därebare aune kädekani kwetre Sansón. Niara ririabare ye ngwane, Jehovakwe ja di biani krubäte ie. ¡León kämikadre kwe ja kisebiti ye namani nuäre kräke! Bati, nitre filisteo 30 murie ketani kaibe kwe. Ye medenbätä, nitre filisteo brukwä namani kräke aune murie ketadre ño kwetre ye tö namanintre gai. Bati deu, Sansón nämene kübien kä Gaza yekänti. Nitre niara rüe ye namani juta yete jukwebätä aune namanintre yete niara ngübare ne kwe dekä rabadre murie kete. Akwa, kä ruäre deu, Sansón nükani krö aune nikani jukwe nämene mikani juta yebiti ye dianinkä kwe. Aune ye bitikäre mikani kwe ja kötärä aune nikani ngwena nememe ngutuä Hebrón ye ken.

Ye bitikäre, nitre filisteo janamene blite Dalila ben, meri nämene ja kukwe mukore Sansón ben aune niebare kwetre ie: ‘Ñobätä Sansón dite ye rabai gare mäi angwane nunkwe ngwian biain krubäte mäi ütiäre. Nun tö niara kai ngite aune kitai käteri’. Dalila tö namani ngwian yei, aisete kukwe ye kani ngäbiti kwe. Kenanbe, ja di nämene kwen medente Sansón ie ye ñaka tö namani mikai gare Dalila ie. Akwa, Dalila namani niara nike jankunu yebätä ja di ngwani nekä kwe aune kukwe bäin ye mikani gare kwe ie. Sansón niebare ie: ‘Ti ni nazareo yebätä ti dokwä drüen tikaka ñaka jire. Ti dokwä drüen tikadrekä angwane ti di riadrekä’. Sansón kukwe ye mikani gare Dalila ie ye ñaka namani kwin, ¿ñan ererea?

 Ye bätäräbe, Dalila niebare nitre filisteo ie: ‘¡Dreta niara mike dite ye nibira gare tie!’. Niarakwe Sansón mikani kübien ja ngukodokwäbiti aune ni mada käräbare kwe niara dokwä drüen tikekä. Angwane Dalila ngratebare: ‘¡Sansón, nitre filisteo tä nete!’. Niara nükani ngwäte, akwa di ñaka namanina gani kwe. Nitre filisteo yei niara nakani, okwä dianinkä aune kitani ngite kwetre.

Bati, nitre filisteo kwati krubäte käkwe ja ükaninkrö ngöbö kwetre Dagón jue yekänti. Niaratre namani ngrente krikri: ‘Ngöbö nikwe käkwe Sansón ye mikani ni kisete. Niara denkä küken aune ani ja denkäbätä’. Niara mikani üra krobu nämene ju ketete ye te ruäre aune nitre ye namani kötaire. Sansón niebare ja dibiti: ‘Jehová, mä raba ja di bienta tie bobukäreta’. Angwane niara dokwä drüen namanina nirienta, aisete üra nämene templo ketete ye gitaninkä ja dibiti kwe. Angwane ju ye ngidianinte aune nitre jökrä nämene yete ye murie neketani, aune Sansón murie neketani arato.