Israela masha law law gaw Yehowa hpe kalang bai kau da nna, gawng ngu sumla ni hpe nawku wa ma ai. Dai majaw, Yehowa gaw shanhte a mungdan hpe Hpilisti masha ni a lata hta ap kau dat ai. Raitim, Yehowa hpe tsawra ai Israela nkau mi mung naw nga ai. Marai langai gaw Mano re. Shi hte shi madu jan hta kashu kasha n lu ai. Lani mi hta, Yehowa gaw Mano a madu jan hpang de lamu kasa langai shangun dat ai. Lamu kasa gaw: ‘Nang shadang sha langai shangai wa na re. Shi gaw Israela ni hpe Hpilisti masha ni a lata kaw nna hkye la na re. Shi gaw Naziri masha rai wa na ra ai’ nga nna tsun ai. Naziri masha ngu ai gaw kadai ni rai kun? Shanhte gaw Yehowa a laksan mayam ni re. Naziri masha ni gaw shanhte a kara zen na ahkang n nga ai.

Mano gaw shadang sha shangai wa ai shaloi Samson ngu nna, amying jaw ai. Samson kaba wa ai shaloi, Yehowa gaw shi hpe n-gun atsam jaw ai. Samson gaw shi a lata lahkawng hte sha, hkanghkyi a n-gup hpe gang je nna sat kau lu ai. Kalang mi hta, Samson gaw shi hkrai sha Hpilisti masha marai 30 hpe sat kau ai. Hpilisti masha ni gaw shi hpe grai nju ndawng nna sat na matu ahkaw ahkang tam nga ai. Lana mi hta, Gaza mare kaw Samson yup taw nga ai shaloi, shi hpe jahpawt du yang sat na matu Hpilisti ni gaw mare chyinghka hta, makoi nna la taw nga ai. Raitim, Samson gaw shana yuptung hta rawt nna, mare chyinghka de sa ai. Dai hpang, bunghku kaw nna mare chyinghka hpe gang malawk kau ai. Dai chyinghka hpe shi a lahpa hta mara hpai nna, Hebron mare makau na bum ntsa de hpai mat wa ai.

Dai hpang, Hpilisti ni gaw Samson a sumtsaw Delila hpang sa nna ndai hku tsun ai: ‘Samson hpa majaw ndai daram n-gun rawng ai hpe san nna, tsun dan lu yang, anhte langai hpra nang hpe gumhpraw 1,100 hpra jaw na. Samson hpe anhte rim nna htawng jahkrat kau mayu ai.’ Delila gaw gumhpraw lu mayu ai majaw myit hkrum dat ai. Shawng hta gaw, hpa majaw dai daram n-gun rawng ai lam Samson n tsun dan ai. Raitim, Delila gaw aput angun tsun ai majaw: ‘Ngai gaw Naziri masha re ai majaw kalang mi mung kara n zen ga ai. Nye kara hpe zen kau yang, ngai hta n-gun atsam nga sana n re’ nga nna Samson gaw shi a makoi magap da ai lam yawng hpe hpaw tsun dan kau ai. Dai hku Samson tsun dan dat ai gaw grai shut ai n re i?

Delila gaw Hpilisti masha ni hpang kalang ta sa nna ndai hku tsun ai:  ‘Samson a makoi magap da ai lam hpe ngai chye sai.’ Delila gaw Samson hpe shi a lahpyen ntsa yup shangun nna, Samson a kara hpe marai langai hpe zen kau shangun ai. Dai hpang Delila gaw: ‘Samson e! Hpilisti masha ni sa wa masai!’ nga nna jahtau dat ai. Samson rawt wa yang, shi hta n-gun atsam n nga mat sai. Hpilisti masha ni gaw Samson hpe rim la nna myi hpe achyaw baw kau ya ai. Dai hpang, htawng de bang kau ma ai.

Lani mi hta, hkying hku law ai Hpilisti masha ni gaw, shanhte a hpara Dagon a nawku jawng hta zuphpawng nga ma ai. ‘Anhte a hpara gaw anhte a lata de Samson hpe ap sai. Samson hpe woi wa marit. Shi hpe mani hpa shatai ga’ nga nna jahtau nga ma ai. Shanhte gaw Samson hpe shadaw lahkawng a lapran tawn da nna, shi hpe asawng nga ma ai. Samson gaw Yehowa hpe: ‘Yehowa e, ngai hpe kalang mi bai n-gun atsam jaw ya rit’ nga nna hpyi jahtau dat ai. Dai aten hta, Samson a kara gaw kalang bai galu wa sai. Samson gaw shi a n-gun atsam mahkra hte shadaw lahkawng hpe kanawng dat ai. Shaloi, htingnu ting arum mat nna dai kata kaw nga ai masha yawng hpe kamyet kau ai majaw yawng si mat ma ai. Samson mung si mat ai.