Txeu israelita fika ta adora imaji otu bês, pur isu Jeová dexa filisteus manda na ses téra. Má tinha alguns israelita ki ta amaba Jeová. Un di es éra Manuá. El ku se mudjer es ka tinha ninhun fidju. Un dia Jeová manda un anju pa bai na mudjer di Manuá. Anju fla-l: ‘Bu ta ben ten un fidju. El ta ben salva Israel di filisteus i el ta ser un nazireu.’ Bu sabe ken ki éra nazireus? Es éra sérvus spesial di Jeová. Nazireus ka podia kortaba ses kabélu.

Ku ténpu, fidju di Manuá nase i el pô-l nómi di Sanson. Kantu Sanson bira grandi Jeová da-l txeu forsa. El konsigi mata un lion sô ku mô, sen ninhun arma. Un dia Sanson mata 30 filisteus el sô. Filisteus ka gostaba di el i es sta ta djobeba manera di mata-l. Un dia di noti, Sanson staba ta durmi na un sidadi ki txomaba Gaza, nton filisteus ben ti na porton di sidadi i es fika la ta spera-l ti ki manxe, pa es mata-l. Má na meiu di noti Sanson labanta, el bai pa porton di sidadi i el rinka-l di paredi. El karega porton na onbru, ti ki txiga riba di un monti pértu di Ebron!

Dipôs, filisteus bai pâpia ku Dalila ki éra namorada di Sanson. Es fla-l: ‘Nu ta da-u un monti dinheru si bu diskubri pamodi ki Sanson ten txeu forsa. Nu krê pega-l i pô-l na kadiâ.’ Dalila seta pamodi el kreba kel dinheru. Na komésu Sanson ka fla-l pamodi ki el tinha txeu forsa. Má el insisti ti ki el fla-l se segredu. Sanson fla Dalila: ‘Nha kabélu nunka ka kortadu pamodi mi é un nazireu. Si N kortadu kabélu N ta perde nha forsa’. Bu ka ta atxa ma Sanson faze un kuza rei di mariadu kantu el konta Dalila se segredu?

Dalila lógu fla filisteus: ‘Dja N sabe se segredu!’ El poi Sanson ta durmi na se ragás i dipôs el manda un algen pa  korta-l kabélu. Dalila grita: ‘Sanson, filisteus sta li!’ Sanson labanta, má dja el ka tinha forsa más. Filisteus pega-l, fra-l se dôs odju i es pô-l na kadiâ.

Un dia, un monti filisteu djunta na ténplu di ses deus Dagon i es grita: ‘Nos deus da-nu Sanson! Traze Sanson pa fóra! Nu ben divirti ku el.’ Es pô-l na meiu di dôs pilar i es goza ku el. Sanson fla: ‘Ó Jeová da-m forsa sô más un bês.’ Kabélu di Sanson dja staba grandi otu bês. El pintxa kes dôs pilar di ténplu ku tudu se forsa. Kel prédiu interu kai na txon, tudu algen ki staba na kel ténplu móre i Sanson tanbê móre.