Abaisraeli bangyi kandi mubatsuka eriramya esyosanamu, neryo Yehova mwalighira Abafilisitini erithabalha ekihugho kyabu. Aliwe habya ihane abandi Baisraeli abanzire Yehova. Omughuma w’okw’ibo abya ini Manoa. Iyo na mukali wiwe sibabya bawithe baana. Kiro kighuma Yehova mwathuma omumalaika oku mukali wa Manoa. Omumalaika mwamubwira athi: ‘Wukendi butha omughalha. Akendi syalhamya Abaisraeli okwa Bafilisitini. Akendi syabya Munaziri.’ Wunasi Abanaziri nga babya bahi? Babya baghombe ba Yehova abali mbaghane. Abanaziri isibali lighirawa erighemba esyonzwiri.

Endambi muyahika, mughalha wa Manoa amabuthwa, amamwahulha mwa Samusoni. Samusoni abere anemukulha, Yehova mwamuha amaaka. Iniakan’itha n’endale omwa byalha biwe. Buthuku bughuma, Samusoni mw’itha Abafilisitini 30 iyuwene. Abafilisitini mubamupona n’erisondya ngoku banga mwitha. Kiro kighuma Samusoni abya inianaghotsere e Gaza omwa kiro, Abafilisitini mubasa okwa geti y’omuyi oyo bamikalha, erilinda nuku banga mwitha. Aliwe omwa kathi k’ekiro, Samusoni mwabuka amaghenda okwa geti n’erikulhayo omwa lhuhimbo. Mwaheka egeti eyo y’okwa bithigho biwe amaghenda okwa kithwe kw’eyighulhu hakuhi ne Heburoni!

Enyuma waho, Abafilisitini mubaghenda eyiri omusika oyo Samusoni abya akathetha, ya Delila, n’eribugha nayu bathi: ‘Thukendi kuha esyosente nene wamathubwira ekikaleka Samusoni iniabya n’amaaka. Thwanzire erimuhamba n’erimuhira omwa ngomo.’ Delila mwanza esyosente, neryo amaligha. Erimbere, Samusoni mwaghana eribwira Delila ekikaleka iniabya n’amaaka. Aliwe Delila mwamuhathikana erihika aho Samusoni amubisulira embiitha yiwe. Mwamubwira athi: ‘Sindi nathaghemba syonzwiri syaghe, kundi ngali Munaziri. Esyonzwiri syaghe syamaghembwa, amaaka waghe iniakend’ihwa.’ Samusoni mwasobya kutsibu akabwira Delila y’ekyo, kwabithe?

 Aho n’aho, Delila mwabwira Abafilisitini athi: ‘Ngabiriminya embiitha yiwe!’ Mwakungutsirirya Samusoni amaghotsera okwa bihinga biwe neryo owundi mundu amaghemba esyonzwiri sya Samusoni. Delila mwabirikira athi: ‘Samusoni, Abafilisitini sibaba! Samusoni mwabuka, amaaka wiwe iniabirihwa. Abafilisitini mubamuhamba, bamamuthobongolha mw’ameso, n’erimuhira omwa ngomo.

Kiro kighuma, Abafilisitini banene kutsibu mubahindana haghuma omwa hekalu ya nyamuhanga wabu Dagoni, n’eribugha bathi: ‘Nyamuhanga wethu abirithuha Samusoni! Muhulhukaye Samusoni! Anathusekya.’ Mubamwimania ahakathi-kathi k’esyonduhi ibiri neryo bamamusekererya. Samusoni mwalhaka athi: ‘Yehova, kisi-kisi wunyihe amaaka omurundi ono musa.’ Okwa buthuku obu, esyonzwiri sya Samusoni syabya isyamabirithasyabya nyiri. Mwakukuma esyonduhi sy’ehekalu n’akaghalha kiwe kosi. Enyumba yosi muyatherera ahisi, yamitha abandu bosi ababya omwa hekalu, na Samusoni mwaholeramu.