Bɔku Izrɛlayt dɛn bigin fɔ wɔship lay lay gɔd dɛn bak, so dat bin mek Jiova alaw di Filistin dɛn fɔ kɔntrol dɛn land. Bɔt sɔm Izrɛlayt dɛn bin de we lɛk Jiova. Wan pan dɛn na Manoa. In ɛn in wɛf nɔ bin gɛt pikin. Wan de, Jiova sɛn wan enjɛl to Manoa in wɛf. Di enjɛl tɛl am se: ‘Yu go bɔn bɔypikin. Da pikin de go sev di Izrɛlayt dɛn frɔm di Filistin dɛn. I go bi Nazarayt.’ Yu sabi udat dɛn na di Nazarayt dɛn? Dɛn na bin spɛshal savant dɛn to Jiova. Dɛn nɔ bin de alaw di Nazarayt dɛn fɔ kɔt dɛn ia.

Afta sɔm tɛm, Manoa in wɛf bɔn bɔypikin, ɛn i kɔl am Samsin. Jiova bin mek Samsin rili gɛt trɛnk we i big. I bin ebul fɔ kil layɔn wit in an dɛn. Wan tɛm, Samsin kil 30 Filistin dɛn in wangren. Di Filistin dɛn et am ɛn dɛn kɔntinyu fɔ luk fɔ we dɛn fɔ kil am. Wan nɛt, we Samsin de slip na wan siti we nem Gaza, dɛn go na di siti in get ɛn wet de so dat dɛn go kil am na mɔnin. Bɔt midul nɛt, Samsin grap go na di siti get ɛn rut di get kɔmɔt na di wɔl. I put di get na in sholda ɛn go wit am na wan mawntin we de nia Ibrɔn!

Leta, di Filistin dɛn go to Samsin in galfrɛn, we nem Dilayla, ɛn tɛl am se: ‘Wi go pe yu bɔku silva mɔni if yu faynd awt wetin mek Samsin rili gɛt trɛnk. Wi want fɔ kech am ɛn put am na prizin.’ Dilayla bin want di mɔni, so i gri. Fɔs, Samsin nɔ bin gri fɔ tɛl am wetin mek i gɛt trɛnk. Bɔt Dilayla kɔntinyu fɔ mɔna am te i tɛl am in sikrit. Samsin tɛl Dilayla se: ‘Dɛn nɔ wande kɔt mi ia bikɔs mi na Nazarayt. If dɛn kɔt mi ia, a nɔ go gɛt trɛnk igen.’ Samsin bin mek big mistek we i tɛl am dat, nɔto so?

Dilayla go tɛl di Filistin dɛn wantɛm wantɛm se: ‘A no in sikrit!’ Dilayla mek Samsin slip na in fut, ɛn i mek sɔmbɔdi kɔt Samsin in ia. Dɔn Dilayla ala lawd wan se: ‘Samsin, di Filistin dɛn dɔn  kam!’ Samsin grap, bɔt i nɔ bin gɛt trɛnk igen. Di Filistin dɛn ol Samsin, bɔs in yay dɛn, ɛn put am na prizin.

Wan de, bɔku bɔku Filistin dɛn bin gɛda na dɛn tɛmpul usay dɛn gɔd we nem Degɔn de. Dɛn bin de ala lawd wan se: ‘Wi gɔd dɔn gi wi Samsin! Una kam wit am na do! Lɛ wi kam laf am.’ Dɛn bin mek i tinap midul tu big big pila dɛn, ɛn dɛn bin de provok am. Samsin kray lawd wan se: ‘E Jiova, duya gi mi trɛnk dis las tɛm.’ Da tɛm de, Samsin in ia bin dɔn lɔng bak. I push di pila dɛn wit ɔl in trɛnk. Afta dat, di wan ol tɛmpul fɔdɔm, ɔl di pipul dɛn we bin de insay de day, ɛn Samsin insɛf day.