Mi Isɔluɛiyaa bɔɔbɔɔ muliŋ vɛlɛ piɔmnda sooluuwo. Le hei, mi Chɛhowa chɛl mi Filitiaŋnda nɔ nda kpaayaa choo. Kɛ Isɔluɛiya apum, ndaa kaala Chɛhowa. Wana pilɛ o nda tɛɛŋ wa Manowaa ni. Ndu nda laa ndɔ ndaa vilu chua le. Paale pilɛ, mi Chɛhowa viam maalikɛinɔɔ naa lanɔɔ Manowaa chua. Mi maalikɛinɔɔ dimul ndu aa: ‘A cho poo violɔɔ. Nduyɛ, ndu cho Isɔluɛiya piŋi Filitiaŋnda o ba ni. Naasaluɛinɔɔ o cho wa ni.’ A sina wanaa ndaa veelu aa Naasaluɛiya wa? Buɛiyaa teŋgeŋnda nda wa le Chɛhowa ni. Ndaa nɔ ma sendi nda kposoŋ te.

Nyɔɔ viu bɛɛ le, mi Manowaa nda laa ndɔ vialu poo. Ma ke ndu diolaŋ aa Samsiŋ. Mɛɛ Samsiŋ sul kaasoŋnɔɔ, mi Chɛhowa ke ndu kpaayaa tau. Mi ndoo dii kpɔkuŋndo a laba. Paale pilɛ, mbo dii Filitiaŋnda 30. Mi Filitiaŋnda tul ndu leyɛ, nduyɛ ma kandu nɛilaŋ nuuviaa le ndu diyɔɔ. Ichɔl pilɛ, Samsiŋ wa o luaŋ o chiee pilɛ diolaŋ aa Kaasa, mi Filitiaŋnda kua o dio kpaki chioo. A wa ndu chumndo loŋ, kanifuule ndaa yeema ma dii ndu idii koŋ. Kɛ a ditɛɛŋndo, mi Samsiŋ tiandu. Mbo kua o dio kpaki chioo, mbo suŋgu dio kpakioo. Mbo handuŋ ndu o kɔɔ, mbo kua a ndu o pembei choo Hibulɔŋ ikɛi.

Samsiŋ ndoo nɔ samaa diolaŋ aa Dilaila. Okoŋ mi Filitiaŋnda kua o ndu lo ma dimul ndu aa: ‘Te a chɔm naa pɛ nyɛ tosa mi Samsiŋ nɔ kpaaya bɛndu waa nuaa wo, ŋ cho num kaniŋ humboŋ ke o waalaŋ niŋ. Ŋ yeema miŋ bii ndu, miŋ wou ndu o chiɛi manyumndo niŋ.’ Le mɛɛ Dilaila ndoo yeema kanioŋ yɛ, mbo chɛl nyɛ nda dimul ndu wo. O tasela ndɔ, mi Samsiŋ kɛɛ le ndu chɔmndo nyɛ tosa mbo nɔ kpaaya bɛndu waa nuaa wo. Kɛ o lo ndu sɔɔŋ yeelɛiyoŋ dimullo haaa mi Samsiŋ chɛl, okoŋ mbo chɔm ndu. Mbo dimul ndu aa: ‘Kani bɛɛ a sendi wɔ ya le. Kanifuule, Naasaluɛinɔɔ ya cho ni. Te a sendi ya pɛ, I nɔ lɛ kpaaya le.’ Biondɔŋ bɛndoo pila Samsiŋ ndoo tosa koŋ ni, lende le?

Mi Dilaila kua chɔ chɔ mbo kɔ dimul Filitiaŋnda aa: ‘I sina nyɛ tosa mbo nɔ kpaaya bɛndoo wo.’ Okoŋ mbo tosa mi Samsiŋ hini ndu o ŋpelu, mbo lɔl. O lo o luaŋ, mbo veelu waŋndo mbo huŋ sendu ndu. Okoŋ, mi Dilaila  deŋi aa: ‘Samsiŋ, Filitiaŋnda hiŋ.’ Mi Samsiŋ tiandu, kɛ ndoo nɔ lɛ kpaaya le. Mi Filitiaŋnda bii ndu, ma pesi ndu hɔltaŋ. Okoŋ, ma wou ndu o chiɛi manyumndo niŋ.

Filitiaŋnda ndaa nɔ mɛlɛka ndaa sooluuwo diolaŋ aa Dakɔŋ. Paale pilɛ, ma chuuŋgiaŋ o waalaŋ niŋ o maaŋ ndaa sooluu ndu wo niŋ. Ma wa deŋioo aa: ‘Mɛlɛka naa tosa miŋ tiu Samsiŋ ba. La soli Samsiŋ o bɛɛ miŋ mam ndu nyɛɛmbɔ.’ Okoŋ, ma huŋ simi ndu o suŋgbuma chiɛiyo tɛɛŋ ma miɔɔŋ, ma wa ndu mamɔɔ. Mi Samsiŋ piɛi o Chɛhowa lo aa: ‘Oo Chɛhowa, chɔɔlu ya vɛlɛ kpaaya ke fɔ!’ A boondei hei, yiiŋnde ndii vil niŋ vɛlɛ Samsiŋ o lebol tau. Mbo nyindu suŋgbuma maaŋ koŋ a kpaaya ndɔɔ kpou. Mi chiɛiyo komba, mi wanaa wa leniŋnda kpou wu. Nduyɛ Samsiŋ bɛɛ mbo wu.