တၢ်မၤလိ ၃၈
ယဟိဝၤယွၤဒုးဆူၣ်ထီၣ် စီၤၡံၣ်ၡိၣ်အဂံၢ်အဘါ
ပှၤအံၣ်စရ့လးဖိအါဂၤ ဘူၣ်ထီၣ်ဘါထီၣ်ဝဲတၢ်ဂီၤတၢ်ဖှီၣ် လၢအသီတဘျီကဒီးလံ. အဃိ ယဟိဝၤယွၤဟ့ၣ်အခွဲးလၢ ပှၤဖလ့ၡသးဖိတဖၣ်ကပၢဝဲ ပှၤအံၣ်စရ့လးဖိအတၢ်လီၢ်တၢ်ကျဲတဖၣ်လီၤ. ဘၣ်ဆၣ် ပှၤအံၣ်စရ့လးဖိလၢ အအဲၣ်ယဟိဝၤယွၤန့ၣ်အိၣ်ဒံးဝဲတနီၤလီၤ. လၢအကျါန့ၣ် ပၣ်ဃုာ်ဒီးစီၤမၤနိန့ၣ်လီၤ. စီၤမၤနိဒီးအမါန့ၣ် အဖိတအိၣ်နီတဂၤဘၣ်. ဘၣ်တနံၤန့ၣ် ယဟိဝၤယွၤဆှၢလီၤအမူခိၣ်ကလူးတဂၤလၢ စီၤမၤနိအမါအအိၣ်လီၤ. မူခိၣ်ကလူးတဂၤအံၤတဲဘၣ်အီၤလၢ– ‘နကအိၣ်ဖျဲၣ်ထီၣ်ဖိခွါတဂၤ, နဖိခွါတဂၤအံၤကမၤပူၤဖျဲး ပှၤအံၣ်စရ့လးဖိလၢပှၤဖလ့ၡသးဖိအစုပူၤ ဒီးအဝဲကမ့ၢ်ပှၤနစၤရံဖိတဂၤလီၤ.’ ပှၤနစၤရံဖိမ့ၢ်ပှၤဒ်လဲၣ်န့ၣ် မ့ၢ်နသ့ၣ်ညါဧါ. အဝဲသ့ၣ်မ့ၢ်ယဟိဝၤယွၤအခ့အပှၤလၢ အလီၤဆီတဖၣ်လီၤ. ပှၤနစၤရံဖိတဖၣ်န့ၣ် အဝဲသ့ၣ်တဘၣ်တံာ် အခိၣ်ဆူၣ်ဘၣ်.
ဖဲစီၤမၤနိအမါ အိၣ်ဖျဲၣ်ထီၣ်အဖိခွါအခါ အဝဲသ့ၣ်ကိးန့ၢ်ဝဲအမံၤလၢ စီၤၡံၣ်ၡိၣ်လီၤ. ဖဲစီၤၡံၣ်ၡိၣ်ဒိၣ်ထီၣ်အခါ ယဟိဝၤယွၤဟ့ၣ်လီၤအီၤ တၢ်ဂံၢ်တၢ်ဘါလၢလၢပှဲၤပှဲၤလီၤ. စီၤၡံၣ်ၡိၣ်မၤသံဝဲ ခ့ယုၢ်လၢအစုလီၤ. ဘၣ်တဘျီန့ၣ် စီၤၡံၣ်ၡိၣ်မၤသံဝဲပှၤဖလ့ၡသးဖိအဂၤ ၃၀ လၢအနီၢ်ကစၢ်လီၤ. လၢတၢ်န့ၣ်အဃိ ပှၤဖလ့ၡသးဖိတဖၣ်သးဟ့စီၤၡံၣ်ၡိၣ် ဒီးဃုမၤသံအီၤလီၤ. ဘၣ်တနၤ ဖဲစီၤၡံၣ်ၡိၣ်မံလၢ ဝ့ၢ်ဂါစၤအပူၤအခါ ပှၤဖလ့ၡသးဖိတဖၣ် လဲၤအိၣ်ခိးစီၤၡံၣ်ၡိၣ်လၢ ဝ့ၢ်အပဲတရီဒ်သိး ကမၤသံအီၤလၢ မုၢ်ဝါထီၣ်အခါန့ၣ်လီၤ. ဘၣ်ဆၣ် ဖဲဖးဖီမုၢ်အဆၢကတီၢ်န့ၣ် စီၤၡံၣ်ၡိၣ်ဂဲၤဆၢထၢၣ်, လဲၤဝဲဆူဝ့ၢ်အပဲတရီ ဒီးထုးထီၣ်ဝဲဝ့ၢ် အပဲတရီဒီးအထူၣ်လီၤ. ဝံၤဒီး စီၤၡံၣ်ၡိၣ်ယိးထီၣ်ဝဲ ဝ့ၢ်အပဲတရီလၢအဖံဘၣ်ခိၣ် ဒီးလဲၤယိးဝဲလၢကစၢၢ်ဒီခိၣ် လၢအိၣ်ဘူးဝဲဒီးဝ့ၢ်ဃ့ဘြိၣ်န့ၣ်လီၤ.
လၢခံန့ၣ် ပှၤဖလ့ၡသးဖိတဖၣ် လဲၤဝဲဆူစီၤၡံၣ်ၡိၣ်အတၢ်အဲၣ်တီ နီၢ်ဒလံလၤအအိၣ်ဒီးတဲဘၣ်အီၤလၢ– ‘နမ့ၢ်တဲဘၣ်ပှၤလၢ ဘၣ်မနုၤအဃိ စီၤၡံၣ်ၡိၣ်အဂံၢ်ဆူၣ်ဘါဆူၣ်လဲၣ်န့ၣ် ပကဟ့ၣ်လီၤနၤစ့အဘ့ၣ်လၢ အကထိတဖၣ်လီၤ. ပအဲၣ်ဒိးဖီၣ်န့ၢ်အီၤဒီး ပၢနုာ်အီၤလၢဃိာ်ပူၤလီၤ.’ နီၢ်ဒလံလၤသးလီဝဲစ့အဃိ မၤဝဲတၢ်အၢၣ်လီၤအီလီၤဒီး ပှၤဖလ့ၡသးဖိလီၤ. လၢအခီၣ်ထံးန့ၣ် စီၤၡံၣ်ၡိၣ် တတဲဘၣ်ဝဲနီၢ်ဒလံလၤ တီတီလိၤလိၤဘၣ်. ဘၣ်ဆၣ် နီၢ်ဒလံလၤသံကွၢ်အီၤတဘျီဝံၤတဘျီတုၤလၢ စီၤၡံၣ်ၡိၣ်ကနၣ်ဝဲတကဲလၢၤဘၣ်. ဝံၤဒီးစီၤၡံၣ်ၡိၣ်တဲဖျါထီၣ် အတၢ်ခူသူၣ်လၢ– ‘ယမ့ၢ်ပှၤနစၤရံဖိအဃိ ယတတံာ်ယခိၣ်ဆူၣ်နီတဘျီဘၣ်. ပှၤမ့ၢ်တံာ်ယခိၣ်ဆူၣ်န့ၣ် ယဂံၢ်ယဘါကလီၤမၢ်ကွံာ်ဝဲလီၤ.’ ခီဖျိလၢစီၤၡံၣ်ၡိၣ် တဲဖျါထီၣ်အတၢ်ခူသူၣ်အဃိ ကဲထီၣ်တၢ်ကမၣ်ဖးဒိၣ်လၢအဂီၢ်လီၤ.
တဘျီဃီန့ၣ် နီၢ်ဒလံလၤတဲဘၣ် ပှၤဖလ့ၡသးဖိလၢ– ‘ယသ့ၣ်ညါ စီၤၡံၣ်ၡိၣ်အတၢ်ခူသူၣ်လံ.’ နီၢ်ဒလံလၤမၤမံစီၤၡံၣ်ၡိၣ်လၢ အကံၣ်ဒုၣ်လိၤ ဒီးအဝဲမၢပှၤတဂၤတံာ်ကွံာ် စီၤၡံၣ်ၡိၣ်အခိၣ်ဆူၣ်လီၤ. ဝံၤဒီးနီၢ်ဒလံလၤကိးပသူထီၣ်လၢ– ‘စီၤၡံၣ်ၡိၣ်ဧၢ, ပှၤဖလ့ၡသးဖိတဖၣ်ဟဲတုၤလံ.’ ဘၣ်ဆၣ် ဖဲစီၤၡံၣ်ၡိၣ်ပၢၢ်ထီၣ်အခါ အဂံၢ်အဘါတအိၣ်လၢၤဘၣ်. အဃိ ပှၤဖလ့ၡသးဖိတဖၣ်ဖီၣ်န့ၢ်စီၤၡံၣ်ၡိၣ်, အူခွဲးထီၣ်ကွံာ်အမဲာ်ချံ ဒီးပၢနုာ်အီၤလၢဃိာ်ပူၤလီၤ.
ဘၣ်တနံၤန့ၣ် ပှၤဖလ့ၡသးဖိလၢအကထိတဖၣ် ပာ်ဖှိၣ်ထီၣ်အသးလၢ အဝဲသ့ၣ်အယွၤလၢ အမံၤမ့ၢ်ဒၤကိၣ်အတၢ်လုၢ်ဟံၣ်ပူၤလီၤ. ဒီးအဝဲသ့ၣ်ကိးပသူထီၣ်လၢ– ‘ပယွၤဟ့ၣ်လီၤပှၤလၢ စီၤၡံၣ်ၡိၣ်လံ. ဟဲကိးစီၤၡံၣ်ၡိၣ်မီၤ. ပကမၤဆဲးအဲးအီၤလီၤ.’ အဝဲသ့ၣ်မၢစီၤၡံၣ်ၡိၣ်ဆၢထၢၣ်လၢ တၢ်လုၢ်ဟံၣ်အထူၣ်ခံထူၣ်အကဆူးဒီး အဝဲသ့ၣ်တဲဆါဝဲစီၤၡံၣ်ၡိၣ်လီၤ. ဖဲန့ၣ်အဆၢကတီၢ် စီၤၡံၣ်ၡိၣ်အခိၣ်ဆူၣ် ဟဲထီထီၣ်ပာ်စၢၤလံ. အဃိ စီၤၡံၣ်ၡိၣ်ကိးပသူထီၣ်လၢ– ‘အိ ယဟိဝၤယွၤဧၢ, ဝံသးစူၤဟ့ၣ်လီၤယၤ တၢ်ဂံၢ်တၢ်ဘါအလီၢ်ခံကတၢၢ်တဘျီ.’ ဒီးစီၤၡံၣ်ၡိၣ်ဆီၣ်ဝဲတၢ်လုၢ်ဟံၣ်အထူၣ်လၢာ်ဂံၢ်လၢာ်ဘါ ဒီးတၢ်သူၣ်ထီၣ်ဒီတဖျၢၣ်န့ၣ်လီၤပှီၢ်ဒိးဝဲ ပှၤအိၣ်လၢအပူၤခဲလၢာ်လီၤ. ဒီးပှၤအိၣ်လၢတၢ်လုၢ်ဟံၣ်ပူၤန့ၣ် သံဝဲကိးဂၤဒဲး ဃုာ်ဒီးစီၤၡံၣ်ၡိၣ်လီၤ.
“ယမၤတၢ်ခဲလၢာ်သ့လၢ ပှၤလၢ အဒုးဆူၣ်ထီၣ်ယဂံၢ်ယဘါတဂၤအပူၤလီၤ.”—ဖံလံးပံၤ ၄:၁၃