Ayingi muna Aneyisaele bayantika sambila diaka e teke. Muna kuma kiaki, Yave wayambula vo bayalwa kwa Afelesetia. Kansi, vakala mpe ye Aneyisaele ana bazolanga Yave. Mosi muna yau i Manoa. Yandi yo nkaz’andi ke bawutanga ko. Lumbu kimosi, Yave watuma mbasi kwa nkaz’a Manoa. O mbasi wamvovesa vo: ‘Osinga wuta mwana. Yandi ovuluza Isaele vana moko ma Afelesetia. Mvauki kekala.’ Nga ozeye aki nani i avauki? I wantu basadilanga Yave salu kiamfunu. Avauki bakanikinwa vo ke bafwete zenga nsuki ko.

Kuna kwalanda, mwan’a Manoa wawutuka, wamvana e nkumbu a Samesone. Vava Samesone kakituka se mbuta, Yave wamvana ngolo zayingi. Wavonda e nkosi mu moko mankatu. Lumbu kimosi, Samesone wavonda 30 ma Afelesetia yandi mosi. Afelesetia ke banzolanga ko, bavavanga una balenda kumvondela. Lumbu kimosi vava Samesone kakala waleka muna fuku, bayenda kumvingila vana muelo a mbanza kimana bamvonda muna mene. Kansi muna fuku, Samesone wasikama yo kwenda vana muelo a mbanza, wasimba e kielo yo katula kio muna yaka. Wanata e kielo kiaki kiampwena-mpwena vana mavembo yavana ntandu a mongo wakala lukufi ye Keberone.

Kuna kwalanda, Afelesetia bayenda kwa Delila wa nkaz’a Samesone yo kumvovesa vo: ‘Nzimbu zayingi tukuvana avo ovavidi zaya kuna kutukanga e ngolo za Samesone. Tuzolele kunkanga yo kunsia muna pelezo.’ Delila watambulwila kadi nzimbu kazola. Kuna lubantiku, Samesone kazola kunzayisa ko kuna kwatukanga e ngolo zandi. Kansi, wakwamanana kunleba yavana kaziula o ntima yo kunzayisa e mbumba. Samesone wamvovesa vo: ‘E nsuki zame ke zisidi zengwa ko kadi i Mvauki. Avo e nsuki zame zizengelo, e ngolo zame zifokoka.’ Samesone  dia uzowa kikilu kavanga wau kanzayisa e mbumba yayi. Nga ke wau ko?

Vana vau, Delila wazayisa Afelesetia vo: ‘E mbumb’andi unzayisi yo.’ Walekesa Samesone vana nkat’andi, i bosi wabokela muntu keza zenga e nsuki zandi. Delila wakaza vo: ‘E Samesone, Afelesetia bezidi!’ Vava Samesone kasikama, kakala diaka ye ngolo ko. Afelesetia bankanga, bantobwele meso yo kunsia muna pelezo.

Lumbu kimosi, ulolo wa Afelesetia bakutakana muna tempelo a Dangone wa nzambi au. Bavovanga vo: ‘O nzambi eto utuvene Samesone. Vaikisa Samesone kimana twansakanena.’ Bantelamesa vana kati kwa malunzi mole yo yantika kunseva. Samesone wasamba vo: ‘E Yave, dodokolo diaku, umpana e ngolo nkumbu wau kaka.’ E nsuki za Samesone zayantika diaka wokela. Wanunguna malunzi ma tempelo muna ngolo zandi zawonso. E nzo yawonso ibwidi, awonso bakala muna tempelo bafwidi. O Samesone mpe ofwidi.