AIsarela amavulu atachikili cheñi kudifukula kudi ankishi, dichi Yehova wetejeli aFilisitinu kuyuula ituña dawu. Ilaña kwadiña aIsarela amakwawu amukeñeli Yehova. Manowa wadiña hakachi kawu. Yena niñodindi hiyadiñahu nawanyanaku. Ifuku dimu, Yehova watemesheli kañelu kudi ñoda Manowa. Kañelu wamulejeli nindi: ‘Wakavwala mwana weyala. Diyi wakayamwina aIsarela kudi aFilisitinu. Wakekala kaNaziri.’ Wuneluki chadiñawu aNaziri? Adiña ambuña aYehova adimena. ANaziri hiyayitejeli kutewula nsuki jawuku.

Chimwahitili mpinji, mwana kaManowa wavwalikili nawa wamutuumbili nindi Samusoni. Samusoni chakuliliyi, Yehova wamwinkeli ñovu chikupu. Wajahili mutupa namakasa. Mpinji yimu Samusoni wajahili aFilisitinu 30 nkawindi hohu. AFilisitinu amuheleli nawa akeñakeñeleña njila yakumujahilamu. Ifuku dimu nawufuku iku Samusoni nakaami muGaza, ayili kuchiisu chamusumba nawa amubelaminini kwenoku kulonda amujahi nantetemena. Ilaña hakachi kawufuku, Samusoni wahindukili, wayili kuchiisu chamusumba nawa wachitupwili nakuchifumisha kumbañu. Wasendeli chiisu hamafwiji indi nakuchitwala hewulu dampidi kwakwihi naHebironi!

Chimwahitili mpinji, aFilisitinu ayili kudi ñoda Samusoni, Delila, nakumwila nawu: ‘Tukukufweta yikunku yasiliva yayivulu nankashi neyi wukwiluka chuma chaletesha Samusoni ekali nañovu nankashi. Tunakukeña tumukwati nakumusha mukaleya.’ Delila wakeñeleña mali, dichi wetejeli. Hakusambila, Samusoni wakaanini kumuleja chuma chaletesheli ekali nañovu nankashi. Ilaña Delila watwalekelihu kumukanjikija kushika nimpinji yasolweliyi kajindilu kindi. Samusoni wamulejeli nindi: ‘Nsuki jami kanda ajitewuleñahu dehi muloña nidi kaNaziri. Neyi nsuki jami akujitewula, ñovu jikummana.’ Samusoni waluwañesheli chikupu chamulejeliyi Delila, netu?

Hohenohu Delila wayilejeli aFilisitinu nindi: ‘Neluki dehi kajindilu kindi!’ Wamukaamikili Samusoni hanyendu yindi, kufumahu walejeli muntu  wacheñi kwinza nakumutewula. Delila wabidikili nindi: ‘Samusoni, aFilisitinu anakuwani!’ Samusoni wahindukili nawa ñovu jindi jamumanini. AFilisitinu amukwatili, amulokweli mesu nawa amushili mukaleya.

Ifuku dimu, aFilisitinu amavulu apompeli mutembeli yanzambi yawu Dagoni, nakubidika nawu: ‘Nzambi yetu natwinki Samusoni! Mwidishenu Samusoni! Kulonda atuseheshiku.’ Amwimikili hakachi kayishimi yiyedi nawa amusupishileña. Samusoni watambikili nindi: ‘Eyi Yehova, mwani nyinki ñovu aka kamu hohu.’ Haniyi mpinji, nsuki jaSamusoni jadiña jakula dehi cheñi. Washinjikili yishimi yatembeli nañovu jindi jejima. Tembeli yejima yahumukili nakujaha antu ejima adiñamu, kushilahu niSamusoni.