Nimku aj Israel e ok ten juntl maj kʼulel kywitz qe tilbʼilal. Tuʼntzun jlu, xi tqʼoʼn Jehová ambʼil kye aj Filisteo tuʼn tkubʼ kyiʼj aj Israel kyuʼn. Noqtzun tuʼnj, attoq junjun aj Israel kʼujlaʼntoq Jehová kyuʼn, ik tzeʼn Manóah. Mintiʼtoq tkʼwaʼl tukʼil t-xuʼjil. Jun qʼij, tzaj tsamaʼn Jehová jun anjel tuʼn t-xi tqʼamaʼn jlu te t-xuʼjil Manóah: «Tzul itzʼje jun tala aju che kletel qe aj Israel tuʼn toj kyqʼabʼ aj Filisteo. Kʼokel te jun nazareo». ¿Ojtzqiʼn tuʼna alkyeqe in che ok te nazareo? Atz in yolin jlu kyiʼj xjal in che ajbʼen te Jehová toj jun tbʼanel tten ex mintiʼtoq in tzaj qʼoʼn ambʼil kye tuʼn tel kymatzoʼn ttxaʼn kywiʼ.

Tej tbʼet ambʼil, ul itzʼje tkʼwaʼl Manóah, ex ok kyqʼoʼn tbʼi te Sansón. Tej tchʼiy, xi tqʼoʼn Jehová nimxix tipun. ¡Jakutoq kubʼ tbʼyoʼn jun bʼalun noq kyukʼil tqʼabʼ! Jun maj, e kubʼ tbʼyoʼn 30 aj Filisteo ex ni jun onin tiʼj. Tuʼntzun jlu, el ikʼen kyuʼn aj Filisteo ex kyajtoq tuʼn tel kynikʼ tiʼj alkyetoq tten jaku kubʼ kybʼyoʼn. Toj jun qonikʼen, in jtantoq Sansón toj tnam Gaza. E pontzun aj qʼoj tiʼj ttziʼ ttnam ex e yon tiʼj atztzun tuʼn tkubʼ kybʼyoʼn aj qsqix. Noqtzun tuʼnj, toj tmij aqʼbʼil, moqa aqʼwil, jaw weʼ Sansón, xiʼ ttziʼ ttnam ex e el tiʼn qe tlamel tnam. Extzun tiqen twiʼ tseʼmil tuʼn tjapun tuʼn tzmax toj twiʼ jun witz aju tok ttxlaj Hebrón.

Yajxitl, i eʼx qe aj Filisteo yolil tukʼil Dalila, aju in xmoxintoq Sansón tiʼj, ex xi kyqʼamaʼn te: «Kxel qqʼoʼne nim mil saq pwaq teya qa ma tzʼel tnikʼa tiʼj tiquʼn at nim tipun Sansón. Tuʼnju qaje tuʼn ttzyet quʼne ex tuʼn tokx qqʼoʼne pres». Tajtoq Dalila aju pwaq, kyjuʼtzun kubʼ toj twitz. Tnejel, nya tajtoq Sansón tuʼn t-xi tqʼamaʼn te Dalila jatumel in tzajtoq tipumal. Noqtzun tuʼnj, tuʼnju nimku maj xi tqanin te iktzun tten kubʼ tiʼj tuʼn ex xi tqʼamaʼn te tiquʼn attoq nim tipun. Xi tqʼamaʼn te: «Bʼajx tzʼel matzoʼn jun maj ttxaʼn nwiʼye tuʼnju paʼn maj qine tuʼn woke te nazareo. Qa ma tzʼel qʼiʼn ttxaʼn nwiʼye, ok knajel wipumale». Ax tok, jun matij nya bʼaʼn aju bʼant tuʼn Sansón tej t-xi tqʼamaʼn jlu te Dalila.

 Xitzun tqʼamaʼn naj Dalila jlu kye aj Filisteo: «¡Ma tzʼel nnikʼe tiʼj tiquʼn at nim tipun!». Bʼant tuʼn Dalila tuʼn tikʼ jtan Sansón twiʼ tqan ex tzaj ttxkoʼn jun xjal tuʼn tel tiʼn ttxaʼn twiʼ. Jawtzun ẍchʼin Dalila: «¡Sansón, ma che ul qe aj Filisteo tiʼja!». El twatl, noqtzun tuʼnj, el tnikʼ tiʼj qa otoq naj tipumal. Tzyettzun kyuʼn aj Filisteo, etz kyiʼn tbʼaqʼ twitz ex okx kyqʼoʼn pres.

Jun qʼij, ok kychmon kyibʼ nimku mil aj Filisteo toj tja kydios aju Dagón tbʼi. Kukxtoq in che ẍchʼin: «Ma tzaj qʼoʼn Sansón toj qqʼabʼ tuʼn qdios. Kyqʼimetze Sansón tuʼn qsaqchan jun rat tiʼj». Kubʼ kyqʼoʼn kyxol kabʼe tqan ja ex e ok ten xmayel tiʼj. Tqʼama Sansón jlu tukʼil tqʼajqʼajel twiʼ: «Najsama Tat Jehová, qʼontza juntl maj wipumale». Otoq chʼiy juntl maj ttxaʼn twiʼ Sansón, tuʼntzunju tukʼil tkyaqil tipumal xi tlamoʼn qe kabʼe tqan ja. Kubʼtzun xitj aju ja lu ex e kyim kykyaqil qeju ateʼtoq toj. Ax ikx te Sansón kyim.