Nupya kwene Aina Izlaeli aingi yaatandike ukupepa ivilubi, fwandi Yeova wazumilizye ukuti Aina Filisiti yayatungulula. Nomba kwali Aina Izlaeli yamwi aatemilwe Yeova. Wenga pali yayo a Manoa. Wene nu muci yatakweti ana. Wanda umwi Yeova watumile malaika uku muci wakwe Manoa. Malaika wamuneenyile ati: ‘Ulakwata umwana umonsi. Mwana wiyo alapususya Ina Izlaeli uku Ina Filisiti. Nupya alaya Umunazili.’ Uzye utumanya aali Anazili? Yali aomvi aiyele yakwe Yeova. Anazili yatazumiliziwe ukupela inyele.

Lino papisile insita, umwana umonsi wakwe Manoa wavilwe, nupya wamutemile izina ati Samusoni. Lino Samusoni wakulanga, Yeova walenzile ukuti aye sana na amaka. Wakomile cisama ukuomvya iminwe. Pa nsita imwi, Samusoni wakomile Aina Filisiti 30. Aina Filisiti yamupasile nupya yatwalilile ukulonda inzila izya kumukomelamo. Wanda umwi usiku ala Samusoni wataalala mu musumba wa Gaza, alwani yakwe yaile ku mpongolo iya musumba nu kutandika ukumulolela pakuti katondo lino akufuma yamukome. Nomba Samusoni wazyusile usiku pakasi, nu kuya uku mpongolo iya musumba, nupya wafumizye icisaasa icapa mpongolo iya musumba. Wasenzile icisaasa cico pa ciye nu kuya papela iya mwamba uwali mupiipi nu ku Hebuloni.

Pa cisila Aina Filisiti yaile kuli Delila, umuci wakwe Samusoni nu ku muneena iyati: ‘Tulakupeela impiya zyakwe siuva izingi ndi cakuti watuneena icalenga Samusoni ukukwata amaka. Tukulonda ukumulema nu kumwika mu cifungo.’ Delila wazumile pano walondanga impiya. Pa kutandika, Samusoni wakanyile ukuneena Delila icalenga ukuti akwate amaka. Lelo wamupamvizye asuka asokolola inkama yakwe. Wamuneenyile ati: ‘Ntatala napelapo inyele pano nene Umunazili.’ Ndi cakuti napela inyele amaka yane yalasila.’ Samusoni waluvyanyizye sana pa kuneena Delila vii, uzye asi avivyo?

 Papo kwene sile Delila aneena Aina Filisiti ati: ‘Nimanya inkama yakwe.’ Wanenyile Samusoni ukuti alale pa maulu yakwe, lyene aneena umwi kuti amupele inyele. Delila apunda ati: ‘Samusoni Aina Filisiti ayayo!’ Samusoni wazyusile, nupya ala atakweti amaka. Lyene Aina Filisiti iyamulema iyamutonkola manso nu kumwika umu cifungo.

Uwanda umwi Aina Filisiti aingi sana yaile umwi tempele muno yapepelanga leza wao Dagoni, yapunzile iyati: ‘leza witu watatupeela Samusoni! Muletini kuno Samusoni! Muleke aize atusansamusye.’ Yamwimike pakasi ka ncesi ziili nu kutandika ukumutumfya. Samusoni wapefile kuli Yeova ati: ‘We Yeova, napaapata mpeko amaka nanti umuku sile onga.’ Pa nsita iyo, ala inyele zyakwe Samusoni izikula nupya. Wasunsile icensi zya kwi tempele na maka yakwe yonsi. Icikuulwa consi caponyile nu kukoma antu yonsi aali umwi tempele kumwi na Samusoni kwene.