Elõñ iaan RiIsrael ro rar bar jino kabuñ ñan ekjab ko. Kõn men in, Jeova ear kõtl̦o̦k an RiPilistia ro irooj ioon ãneo ãneer. Ak ekar wõr jet RiIsrael ro me rar yokwe wõt Jeova, im juon iaaer ej em̦m̦aan eo etan Manoa. Ear wõr juon pãleen ak ear ejjel̦o̦k nejierro ajri. Juon raan Jeova ear jilkinl̦o̦k juon enjel̦ ñan ippãn kõrã eo pãleen Manoa. Enjel̦ in ear jiroñe im ba: ‘Enaaj wõr juon nejũm̦ l̦addik. Enaaj lo̦mo̦o̦ren RiIsrael ro jãn RiPilistia ran̦. L̦adik in enaaj juon RũNazerait.’ Kwõjel̦ã ke kar wõn RũNazerait ro? Eokwe, armej rein kar rũkarejar ro rejejuwaan an Jeova, im rar jab aikuj in m̦wijbar.

Tokãlik ear l̦otak l̦adik eo nejin Manoa, im ear likũt etan Samson. Ke Samson ear rũttol̦o̦k, Jeova ear kõm̦m̦an bwe en lukkuun kajoor. Joñan, ear m̦an juon l̦aiõn kõn pein. Im ilo bar juon iien, Samson ear m̦ane 30 armejin Pilistia. Joñan an kar RiPilistia ro dike, rel̦akkar pukot kilen aer m̦ane bwe en mej. Juon boñ ke Samson ear kiki ilo Geza, RiPilistia rein rar etal ñan kõjãmin wõrwõr eo an jikin in im kõttar l̦o̦k ñan jibboñõn raan eo tok juon bwe ren m̦ane. Ak ke ej lukwõn boñ, Samson ear jerkak im etal ñan kõjãmin jikin in, im ear tũm̦wi kõjãm eo jãn wõrwõr eo. Im ear kotake im bõkl̦o̦k ñan ioon juon tol̦ epaake Hibron!

Tokãlik RiPilistia ro rar etal ñan ippãn kõrã eo jeran Samson etan Dilaila, im rar ba ñane: ‘Kõm naaj lewaj elõñ to̦ujin jããn jelba el̦aññe kwõnaaj kõm̦m̦an bwe Samson en kwal̦o̦k unin an lukkuun kajoor. Kõm kõn̦aan jibwe im likũti ilo kalbuuj.’ Kõnke Dilaila ear kõn̦aan bõk jããn eo, ear ba bwe enaaj kõm̦m̦ane men eo rar kajjitõk ippãn. Ilo jinoin Samson ear m̦akoko in kwal̦o̦k ñane unin an lukkuun kajoor. Ak Dilaila ear lukkuun akwel̦ap m̦ae iien eo Samson ej kab kwal̦o̦k unin an kajoor. Samson ear ba: ‘Ijjañin kar m̦wijbar ñan jidik, kõnke ña juon RũNazerait. Ñe inaaj m̦wijbar, enaaj jako aõ kajoor.’ Samson en kar jab kwal̦o̦k men in ñan Dilaila!

 Innem Dilaila ear m̦õkajl̦o̦k im ba ñan RiPilistia ro: ‘Ijel̦ã unin an kajoor!’ Ãlikin ear kakikiki Samson ioon neen im kũrtok juon bwe en m̦wijbare. Innem Dilaila ear lam̦õj im ba: ‘Samson, RiPilistia ro rã!’ Samson ear jerkak, ak ejako kajoor eo an. Innem RiPilistia ro rar jibwe im kõm̦m̦an bwe en pilo, im rar kalbuuji.

Juon raan, elõñ to̦ujin RiPilistia rar kobatok ippãn doon ilo tampel̦ eo an anij eo aer etan Degon, im rar lam̦õj im ba: ‘Anij eo ad ear kõm̦m̦an bwe jen anjo̦ ioon Samson! Kadiwõjtok bwe jen kõm̦m̦an kõjak kake!’ Innem rar kajutake ikõtaan ruo joor im kajjirere kake. Samson ear jar im ba: ‘O Jeova, jouj im bar kõkajoor eõ.’ Ilo iien in, bõran Samson ear bar aetokl̦o̦k. Innem ear iuuni joor ko ilo tampel̦ eo kõn aolepen an maroñ. M̦weo ear okjak im ure aolep armej ro ilowaan, im aolepeer rar mej ekoba Samson.