Miakej israelitas oksepa peujkej kinueyichiuaj tiotsitsin. Yejua ika Jiova kikauak maj akin nemiaj Filistea kintajyouiltianij. Sayoj ke moajsiaj seki israelitas akin kemaj kitasojtayaj Jiova, kemej Manóah. Yejua uan inamik amo kinpiayaj konemej. Se tonal, Jiova kititanik se ángel maj kiluiti inamik Manóah: “Tikpiati se konetsin akin kinmakixtis israelitas maj filisteos amo kintajyouiltikanok. Yeski se nazareo”. ¿Tikmati akonimej katkaj nazareos? Yejuan kitekitiliayaj Jiova kemej amo akin okse kichiuaya uan monekia amo kitekiskej inintson.

Panokej tonalmej, uan yolik ikonetsin Manóah, uan kitokaytijkej Sansón. Keman moskaltij, Jiova kimakak miak chikaualis. ¡Uelia kimiktiaya se tekuani sayoj ika imauan! Se tonal, iselti kinmiktij 30 filisteos. Yejua ika filisteos kiteltauelitayaj uan kitemouayaj keniuj ueliskiaj kimiktiskej. Se youak, keman Sansón kochtoya ompa Gaza, yajkej ikalakyan nejon altepet uan ompa kichixkej porin kinekiaj kimiktiskej keman tanesiskia. Sayoj ke, tajkoyouan, Sansón meuak, yajki ikalakyan altepet uan kikixtij puertas tein ika tatsakuayaj. Ompa kimamajteuak hasta ajsik ikuapan se tepet tein pouia kampa ika moajsia Hebrón.

Satepan, filisteos tajtotoj iuan Dalila, akin katka inovia Sansón, uan kiluijkej: “Timitsmakaskej miak tomin komo titechmatiltia keyej Sansón tel chikauak. Tiknekij tikitskiskej uan tiktsakuaskej”. Dalila kinekia tomin, yejua ika kijtoj ke kichiuas. Yekinika, Sansón amo kinekia kiluis keyej tel chikauak katka. Sayoj ke Dalila kiteltajtaniaya hasta kiyolajxitij, yejua ika Sansón kiluij keyej tel chikauak katka. Sansón kiluij: “Amo keman nechtekilianij notson porin ninazareo. Komo nechtekiliskiaj, nikpoloskia nochikaualis”. ¿Melauj ke tel amo kuali maj Sansón kiluiani Dalila nejon?

 Dalila niman kiniluij filisteos: “¡Nikmatikya keyej tel chikauak!”. Kichiuak maj Sansón kochini itankuako uan kinotsak aksa maj kitekili itson. Ompa Dalila tsajtsik: “¡Sansón, filisteos nikan yetokej!”. Yejua ijsak, sayoj ke kiitak ke kipolojka ichikaualis. Filisteos kikitskijkej, kikixtilijkej iixtololouan uan kitsakkej.

Se tonal, tel miakej filisteos mosentilijkej kampa kiueyichiuayaj inintiotsin, Dagón. Yejuan chikauak kijtouayaj: “Totiotsin techmaktilij Sansón. Xikixtikan maj techyolpakti tepitsin”. Kiketskej tatajko itech ome kalikximej uan kipijpinaujtijkej. Sansón kijtoj chikauak: “Jiova, ika kualtakayot, oksepa xinechmaka chikaualis”. Itson oksepa moskaltijkaya, yejua ika kitopeuak ome kalikximej ika nochi ichikaualis. Kali xitinik uan kinmiktij nochin akin ompa yetoyaj. Sansón no mikik.