Jehova okwe etha Aafilisti ya pangele oshilongo shAaisraeli, molwaashoka Aaisraeli oyendji oya li ya tameke ishewe okulongela iikalunga. Ihe opwa li Aaisraeli yamwe mboka ye hole Jehova. Gumwe gwomuyo oManoak. Manoak nomukadhi kaya li ye na aanona. Esiku limwe Jehova okwa tumu omuyengeli komukulukadhi gwaManoak. Omuyengeli okwa lombwele omukadhi a ti: ‘Oto ka mona okanona okamati. Otaka ka mangulula Aaisraeli miikaha yAafilisti. Otaka ka kala Omunasiri.’ Mbela owu shi kutya Aanasiri aantu ya tya ngiini? Aanasiri oya li aakalele yaJehova yi ikalekelwa. Kaya li ya pitikwa ya tete omafufu gawo.

Konima yethimbo, okamwanamati kaManoak osho ka valwa, nokwe ka luku Simson. Sho Simson a koko, Jehova okwe mu pe oonkondo. Simson okwa li a dhipaga onkoshi niikaha ye. Oshikando shimwe Simson okwa dhipagele Aafilisti 30 oye awike. Aafilisti oye mu tondo e taya kala taya kongo omikalo moka taya vulu oku mu dhipaga. Uusiku wumwe manga Simson a kotha muGaza, Aafilisti oya yi posheelo shoshilando e taye mu tegelele mpoka, opo ye mu dhipage ongula sho ta piti mo. Ihe mokati kuusiku, Simson okwa penduka, okwa yi kosheelo shoshilando e ta nakula mo iikulo yomweelo gwoshilando. Omweelo okwe gu itsike komapepe ge e ta yi kondungu yondundu yi li popepi naHebron.

Konima yethimbo, Aafilisti oya yi komukadhona gwaSimson, Delila, e taya ti: ‘Otatu ke ku pa iimaliwa iisiliveli omayovi, ngele owe tu talele kutya omolwashike Simson e na oonkondo. Otwa hala oku mu kwata noku mu tula mondholongo.’ Delila okwa zimine, molwaashoka okwa li a hala iimaliwa. Petameko, Simson okwa tindi okulombwela Delila kutya omolwashike e na oonkondo. Delila okwe mu pula ta tsitsimike sigo a loloka e te mu lombwele ngaa nee oshiholekwa she. Simson okwe mu lombwele a ti: ‘Omafufu gandje ihaga tetwa, oshoka ngame Omunasiri. Ngele onda kululwa, nena ote kanitha oonkondo dhandje.’ Simson ina ninga tuu epuko enene, sho e shi mu lombwele!

 Nziyanziya Delila okwa lombwele Aafilisti a ti: ‘Oshiholekwa shaSimson nde shi tseya!’ Delila okwa kotheke Simson mekolo lye, e ti ithana gumwe e ye a tete ko omafufu gaSimson. Delila okwi igidha a ti: ‘Simson, Aafilisti oyo mbo!’ Simson okwa penduka nokwa mono kutya okwa kanitha oonkondo dhe. Aafilisti oye mu kwata e taye mu tsipula omeho noye mu tula mondholongo.

Esiku limwe Aafilisti omayuvi oya gongala motempeli yoshikalunga shawo Dagon, tayi igidha taya ti: ‘Kalunga ketu okwe tu sinditha Simson! Ithaneni Simson, e tu shambudhe.’ Oye mu thikameke pokati koongudhi mbali e taye mu sheke. Simson okwa galikana muule a ti: ‘Jehova, pe ndje oonkondo dhandje polumwe.’ Ethimbo ndyoka omafufu gaSimson oga li ga koka ishewe. Simson oku undula oongudhi dhotempeli noonkondo dhe adhihe. Etungo olyo ongotele mumwe, e tali dhipaga aantu ayehe mboka ya li motempeli, na Simson okwa sile mo wo..