Vaavaa Aisarayeli ancipale yaakookenlaaya olapa soophwaniherya, Yehova aaheeriha wi Afilisti yaahooxeke Aisarayeli. Nyenya aakhalawo Muisarayeli aamusivela Yehova. Nsina nawe iichaniwa Manowa. Owo ni mwaariye hiyaayara. Nihiku nimoha Yehova aamuruma munkeelo oya wa mwaara a Manowa. Munkeelo aamuleela ariki: ‘Onammuyara mwaana onahaala woopola nloko na Isarayeli mmatani mwa Afilisti. Onahaala okhala Munasiri.’ Onnasuwela wi yaakhala taani Anasiri? Yaakhala akapuro avameekhaaya a Yehova. Anasiri hiyeemereryiwa ocema miihi.

Moovira wa elukuluku mwaana aayariwa, iichaniwa Samsoni. Vaavaa innunweiye Yehova aaheeriha wi akhale mulipa akuru. Samsoni aanwerya omwiipha mwaco ni mata. Mu ekhwa emoha, aawiipha Afilisti 30 ari mukhateiye. Afilisti yaanamooceela nave yaaneererya mukhalelo wa omwiipha. Nihiku nimoha Samsoni aakona o Kasa, Afilisti yaarukurerya mikhora sa epooma nave yaanalipelela wi avinyaka wooxixelo emwiiphe. Owo aavinya ohiyu aphola masele a epooma akapaca akeriha omwaako waacamela o Heporoni!

Voocharela, Afilisti yaaloca ni mwaara a Samsoni, Talila: ‘Waavye osuwela inarwaayawo ikuru sa Samsoni wi ninmake. Hiyaano nnamoovaha ikhorowa sa eparata ncikhwi ni nsana nimoha.’ Talila aanachuna ikhorowa, nave aaheemererya. Wuupaceryani Samsoni aanakhooca omuleela ikuru sawe saarweelaayavo. Nyenya mwaariye annatitelela omukoha ophiyerya owo oloca ariki: ‘Mmuruni mwaka hinintonko oviramo ncemo. Muru aka wacemmwa kinamukhala ooceecheya ntoko alopwana akina.’ Samsoni aahesa nthowa na omuleela mwaariye, tahi eparipari?

Talila mwawaakuveya aahaaleela Afilisti ariki: ‘Vano ookileela yeeparipari!’ Owo aaheeriha wi Samsoni akone vameconi vawe nave aacema miihi awe. Vano Talila aakhuwela: ‘Samsoni, Afilisti aaphiya!’ Samsoni aavinya ahirino ikuru. Afilisti yaamphara, emmaka emurihela mukalaposo.

Nihiku nimoha Afilisti ancipale yaathukumana mu empa ya muluku aya Takoni enaloca eriki: ‘Muluku ahu omveleela mwiicani Samsoni mmatani mwahu. Mmuruuhe wi anihakalalihe!’ Awo yaamukuha veeri va apoco apiili  nave enathatano. Samsoni aavekela: ‘Pwiya mukivahe ikuru ntoko sa khalai.’ Miihi a Samsoni yiiso yunnunwe. Owo aahaapharela apoco a empa nave aakakha ni ikuru sawe soothene. Yaakurumuwa empa, ekhwa achu oothene yaari mummo vamoha ni Samsoni.