Ląʼí Ízrel dineʼé edaʼalyaii bichʼįʼ nidahojiłáago baa nináájíkai. Áko Filístiya dineʼé hakéyah yee ádídahólníihgo Jiihóvah tʼóó yá hasʼą́. Ízrel dineʼé łaʼ tʼahdii Jiihóvah ayóóʼádayóʼní. Éí łaʼ hastiin Manówah wolyé. Manówah dóó beʼasdzą́ą́ éí tʼahdoo baʼáłchíní haleeh da. Jiihóvah éí níłchʼi naalʼaʼí Manówah beʼasdzą́ą́ yichʼįʼ ayííłʼaʼ. Éí níłchʼi naalʼaʼí áháłní: ‘Niyáázh hodooleeł, éí bidineʼé Filístiya dineʼé yitsʼąą yisdéidoonił, áádóó Názarait nilı̨́į doo.’ Názarait éí Jiihóvah yá ndaalʼaʼ, áko bitsiiʼ doo dayiigéesh da.

Manówah éí ashkii há yizhchı̨́ áádóó Sámson bee jíízhiʼ. Sámson neeyą́ągo Jiihóvah ayóó ábóodziilgo ábiilaa. Kótʼéego éí náshdóítsoh bitsiijįʼ ditłʼooígíí bílaʼ tʼéiyá yee yiyiisxı̨́. Łah Sámson tʼáá sáhí Filístiya dineʼé tádiin yiltʼéego neistseed. Éí biniinaa Filístiya dineʼé ayóó dahojoołá. Dahodiyoołhééł biniyé tʼáá áłahjįʼ háká dadéezʼı̨́ı̨́ʼ. Géízadi łah Sámson ajiłhoshgo kin dah shijaaʼ chʼéʼétiingi habaʼ naháaztą́. Ahbínígo dahodiyiilyééł daaníigo nidahaʼá. Tłʼéʼííłníiʼgo Sámson nídiiʼnaʼ. Dáádílkał hayíínil áádóó biwostis dah sinilgo Hííbran bíighahgi dah yiskʼid bighą́ą́ʼgóó haizhjaaʼ.

Filístiya dineʼé Sámson beʼatʼééd Diiláílah ádeiłní: ‘Sámson ayóó ábóodziilgo ábósinígíí bee nihił hwíínílneʼgo, béésh łigaii ląʼí bą́ą́h ílı̨́įgo naadadiiʼnił.’ Diiláílah éí béeso bíchą́yizhdéelniʼ tʼáá áko jidííniid. Awáalyah adah hodoołtʼeeł yindahaʼá. Sámson bidziilgo ábósinígíí yee hoł hodoolnihgi hatsʼąą neiniłʼin ńtʼééʼ. Ákondi Diiláílah shił hólneʼ níigo yee niilteeʼ. Hadziilgo áhósin yę́ę bee bił hojoolneʼ. ‘Názarait nishłı̨́, éí biniinaa shitsiiʼ tʼahdoo kʼégéésh da,ʼ bijiní. ‘Ákondi shitsiiʼ kʼégizhgo éí doo shidziil da deeshłeeł,ʼ ní. Daʼ ákoósh díí bee bił hojoolneʼígíí biniinaa ayóó átʼéego ajisih?

 Nazhniłʼin yę́ę Filístiya dineʼé yił hodoolnih yiniyé Diiláílah ákǫ́ǫ́ nídiilwod. Sámson éí Diiláílah bitséskʼidgi ajiiłhaazh. Náánáłaʼ hachʼįʼ yiyííłʼaadgo hatsiiʼ kʼídéezhgizh. Diiláílah hadoolghaazhgo ání: ‘Sámson, Filístiya dineʼé naa níjééʼ!ʼ Sámson chʼéédzídzid ńtʼééʼ doo hadziil da. Filístiya dineʼé dahasił áádóó hanááʼ hayídaʼashiizhgo awáalyah adahwiishan.

Filístiya dineʼé bidiyin Déígan deidósin biniyé áłah silı̨́įʼgo dadilwoshgo ádaaní: ‘Nihidiyin nihíká eelwodgo Sámson nihidáahgi niidlóóz. Haaʼíshąʼ, kʼad bá nidahwiiltʼiʼ doo.ʼ Áko díí áłah nilı̨́įgi naakigo yaʼiiʼáh bitaʼgi jizı̨́įgo há nidahałtʼiʼ. Sámson éí Jiihóvah yéigo bichʼįʼ sozdilzingo ájíní: ‘Tʼáá shǫǫdí Jiihóvah, tʼááłáhídi shidziilgo ánáshídlééh.ʼ Hatsiiʼ éí nídíneesą́ą́ lá, áko hadziil níjísdlı̨́ı̨́ʼ. Sámson bidziil tʼáá átʼé yee yaʼiiʼáh yę́ę ałtsʼą́ąjįʼ kóyiilaa. Áko kin tʼáá átʼé ałhiih nááłdááz. Tʼáá ájíłtso, Sámson tʼáá bił, jineezná.