Ova Isilayeli ovanyingi avahimbika vali okufenda ovikahuku, moluotyo Jeova eveyeke vamoneswe onkhumbi no va Filisteu. Mahi ankho pena ova Isilayeli vamwe vehole Jeova. Umwe puvo omulume umwe utiwa Manoa. Manoa nomukai wae ankho vetupu ovana. Onthiki imwe Jeova atumu oandyu komukai wa Manoa. Oandyu aimupopila okuti: ‘Mokala no mona. Omona oo mayovola ova Isilayeli ko va Filisteu. Makala omu Nazileu.’ Ove utyii ovanthu patyi vatiwa ova Nazileu? Ovanthu valinga ovilinga vielikalela via Jeova. Ova Nazileu ankho kavapondola okukeyua onohuki.

Etyi pakala katutu omona wa Manoa atyitwa ankho utiwa o Sansau. Etyi Sansau ekula Jeova emuavela ononkhono ononene. Sansau ankho una ononkhono ononene utyivila okuipaa onkhulika nomankhanya. Onthiki imwe Sansau waipaele ova Filisteu 30 aike vala. Ova Filisteu ankho vemuyele iya ankho vatualako okumuovola opo vemuipae. Onthiki imwe kounthiki Sansau ankho ulele motyilongo tyitiwa Gaza, ova Filisteu avakala ponombundi mbepunda-umbo olio opo komuhuka vemuipae. Mahi Sansau apinduka-po mokati kovinthiki atukula-po epito liepunda-umbo olio. Elityindi potyipepe alo pokatongo-tongo komphunda imwe ikala popepi no Hebron!

Konyima ova Filisteu avaende ku Dalila omuhikuena wa Sansau, avemupopila okuti: ‘Inkha utupopila omokonda yatyi Sansau ena ononkhono ononene matukuavela onombongo ononyingi mbo palata. Onthue matumukuate atumupake mokaleya.’ Dalila ankho wakamba onombongo, etavela. Tete Sansau ehetavela okupopia mokonda yatyi ena ononkhono ononene. Mahi konyima apopi oku kutunda ononkhono mbae. Wemupopila okuti: ‘Onohuki mbange nalumwe mbakeyelwe mokonda ame ndyi mu Nazileu.’ ‘Inkha onohuki mbange mbutetwa hikala vali nononkhono.’ Sansau walinga omapita etyi apopila Dalila, hatyo?

 Dalila liwa-liwa akatolela ova Filisteu okuti: ‘Nanoñgonoka opi patunda ononkhono mbae!’ Alangeka Sansau kovikalo viae aiti opo vakeye onohuki mba Sansau. Dalila eliyavela ati: ‘Sansau ova Filisteu veya!’ Sansau apinduka-po, mahi tyina atala utupu vali ononkhono. Avemukuate avemukutu avemutiula omaiho avemupake mokaleya.

Onthiki imwe, ova Filisteu valinga otyipito tyimwe otyinene pala okufenda huku yavo Dagon, vakuililila otyo vati: ‘huku yetu wetuavela Sansau! Avakapola Sansau mokaleya! Otyo vanyanena kwe.’ Avemupakela pokati ko nomphandyi onombali, otyo vemukuela. Sansau aihanena peulu okuti: ‘Mbambavo Jeova mphevo vali ononkhono otyikando etyi.’ Ankho onohuki mba Sansau mbukahi nokukula vali. Sansau atahula-po onomphandyi mbondyuo onene. Ovanthu aveho ankho vekahi mondyuo oyo avankhi, Sansau nae ankhi.