Nandayew lamet so dakel ya Israelita ed saray imahen, kanian pinaulyan nen Jehova ya sakopen na saray Filisteo so dalin da. Balet wala ni ray Israelita ya inaro day Jehova. Sakey ed sikara so lakin say ngaran to et Manoa. Walay asawa to, pero anggapoy anak da. Aminsan, angibaki si Jehova na anghel ed asawa nen Manoa. Oniay imbaga na anghel: ‘Nawalaan kay anak a laki. Iligtas toy Israel ed saray Filisteo. Sikatoy magmaliw ya Nazareo.’ Antam tay Nazareo? Saray Nazareo et espisyal ya lingkor nen Jehova. Ag-ira nayarin manpakatli na buek da.

Nen pinmaway lay anak di Manoa, say inngaran da ed sikato et Samson. Nen binmaleg lay Samson, ginawa nen Jehova ya mabisbiskeg. Sarag nen Samson ya pateyen so leon panamegley labat na lima to. Aminsan, pinatey ton bukor so 30 ya Filisteo. Kakkabusol na saray Filisteo si Samson, kanian labay dan pateyen. Aminsan ya labi, nen naugip si Samson diad syudad na Gaza, linmad puerta na syudad iray Filisteo tan nanalagar ira diman pian pateyen day Samson diad kabuasan. Balet diad pegley labi, binmangon si Samson insan linmad puerta na syudad tan binagot to itan. Sinakbat to so puerta anggad toktok na palandey ya asingger ed Hebron!

Kayari na satan, linma iray Filisteo ed biin inaro nen Samson ya say ngaran to et Delila, tan imbaga dad sikato: ‘No naamtaan moy sekreto nen Samson no akin ya mabisbiskeg, ibagam ed sikami pian ikdan mi kay libolibon piraso na pilak. Ta labay min erelen tan ipriso.’ Labalabay nen Delila ya naala may kuarta, kanian pinmayag. Nen unona, aglabay ya ibaga nen Samson ed sikato no akin ya mabisbiskeg. Balet agtinundaan nen Delila ya tinepetan, kanian imbaga lanlamang nen Samson so sekreto to. Kuan to: ‘Agnin balot akatlian so buek ko ta Nazareo ak. No nakatlian so  buek ko, onkapuy ak.’ Dapat ag-imbaga nen Samson ed si Delila so sekreto to, awa?

Imbagan tampol nen Delila ed saray Filisteo: ‘Antak lay sekreto to!’ Pinaugip toy Samson ed akwalan to, tan walay tinawag ton mankatli ed buek nen Samson. Insan inmeyag si Delila: ‘Samson, nitan la ray Filisteo!’ Nen binmangon si Samson, anggapo lay biskeg to. Sikatoy siningkat na saray Filisteo tan binulag da, insan da impriso.

Aminsan, nantitipon iray libolibon Filisteo diad templo na dios dan si Dagon, tan iyeeyag da: ‘Si Samson et inter ed sikatayo na dios tayo! Awit yo diay Samson pian walay panliketan tayo!’ Sikatoy pinaalagey da ed pegley na duaran lusek, insan da inelek-elekan. Nampikasi si Samson: ‘Aman Jehova, ikdan mo ak pa lamet na biskeg, anggan natan labat.’ Diad saman et dinmukey lay buek nen Samson. Intulak to ray lusek na templo, ya inyupo-upot toy biskeg to. Ageba so templo, kanian inatey so amin ya totoon wadman, pati si Samson.