E kʼi israelitas jumul chik xkimaj kiqʼijilaxik e tyox. Rumal laʼ Jehová xuyaʼo che ri winaq re Filistea xetaqan pa uwiʼ ri tinamit Israel. Are kʼu jujun chke ri israelitas xkiloqʼoqʼej ri Jehová, jun chke are Manóah. Areʼ rukʼ ri rixoqil e kʼo ta kalkʼwal. Jun qʼij, Jehová xutaq lo jun ángel rech xubʼij che ri rixoqil Manóah: «Kkʼojiʼ na jun awal ala che keresaj ri israelitas pa kiqʼabʼ ri filisteos. Are jun nazareo». ¿La awetaʼm e jachin ri e nazareos? E winaq che kkipatanej Jehová rukʼ jun utzalaj chak xuqujeʼ kyaʼ ta chke che kkiqupij ri kiwiʼ.

Are chiʼ xqʼax ri tiempo, xalax ri ukʼojol Manóah, xkikoj Sansón che ubʼiʼ. Are chiʼ xkʼiyik, Jehová xuya nimalaj uchuqʼabʼ. ¡Kkun riʼ kukamisaj jun koj xaq xiw rukʼ ri uqʼabʼ! Jun qʼij, xeʼukamisaj 30 filisteos kʼo ta jun xtoʼwik. Rumal laʼ ri filisteos itzel kkilo kkaj kkil ri kkibʼan che ukamisaxik. Pa jun chaqʼabʼ, Sansón tajin kwar pa Gaza. Ri e ukʼulel xebʼe chuchiʼ ri tinamit rech xkeyej chilaʼ rech kkikamisaj chukabʼ qʼij. Are kʼu pa nikʼaj che ri chaqʼabʼ, Sansón xwalijik, xbʼe chuchiʼ ri tinamit xresaj ri uchiʼ ja che ri tapya. Tekʼuriʼ xukʼam bʼi pa uwiʼ ri utelebʼ xpaqiʼ kʼa pa uwiʼ jun juyubʼ chunaqaj Hebrón.

Tekʼuriʼ, ri filisteos xetzijon rukʼ Dalila, che are unovia Sansón, xkibʼij che: «Kqatoj miles saq pwaq chawe we katkunik kawetaʼmaj ri rumal che Sansón kʼo nim uchuqʼabʼ. Rumal che kqaj kqachapo tekʼuriʼ kqakoj pa cheʼ». Dalila kraj ri pwaq, rumal laʼ xubʼij che kubʼan ri kkibʼij che. Nabʼe, Sansón kraj taj kubʼij che Dalila jawiʼ petinaq wi ri uchuqʼabʼ. Are kʼu areʼ xuya ta kan utaʼik che kʼisbʼal re xubʼij che ri petinaq wi ri uchuqʼabʼ. Xubʼij che: «Kʼo ta jumul qupim ri nuwiʼ rumal che in nazareo. Wet kqupix ri nuwiʼ, kel ri nuchuqʼabʼ». Utz taj che Sansón xubʼij wariʼ che Dalila, ¿paʼ?

Aninaq, Dalila xubʼij chke ri filisteos: «¡Wetaʼm chi ri rumal!». Xubʼano che Sansón xwar pa uwiʼ ri uchʼek tekʼuriʼ xusikʼij jun winaq  rech kuqupij ri uwiʼ. Tekʼuriʼ Dalila xuraq uchiʼ: «¡Sansón, ri e filisteos e kʼo waral!». Sansón xkʼastajik, are kʼu xunaʼo che kʼo ta chi uchuqʼabʼ. Ri e filisteos xkichapo, xkimoyirisaj tekʼuriʼ xkoj pa cheʼ.

Jun qʼij, miles chke ri filisteos xkimulij kibʼ pa ri templo re ri kidios Dagón. Kkiraq kichiʼ: «Ri qadios xuya Sansón pa qaqʼabʼ. Chiwesaj lo Sansón rech kojetzʼan jubʼiqʼ». Xkitakʼabʼaʼ chuxoʼl kebʼ raqan ja tekʼuriʼ ketzeʼn chrij. Xuraq uchiʼ Sansón xubʼij: «Oh, Jehová, chabʼanaʼ toqʼobʼ, chayaʼ chi jumul nuchuqʼabʼ». Jumul chik xkʼiy ri uwiʼ, rumal laʼ xuchap ri kebʼ raqan ja rukʼ ronojel uchuqʼabʼ. Ri nimalaj ja xwulinik xuqujeʼ xekam konojel ri e kʼo chilaʼ. Sansón xuqujeʼ xkamik.