Achca israelitacunaca yanga dioscunata cutin adoracurcacuna. Chaimantami Jehová Diosca filisteocuna paicunata mandachun saquirca. Pero huaquincunaca Manoa (Manóah) runa shinami Jehovata sirvicurcacuna. Manoapaj huarmica huahuacunataca mana charircachu. Shuj punllaca Diosca shuj angeltami paipaj huarmipajman cacharca. Chai angelca, ‘shuj huahuatami charigringui. Paimi israelitacunataca filisteocunamanta quishpichinga. Nazareomi canga’ nircami. ¿Nazareocunaca picunataj carca? Diospajlla chꞌicanyachishcacunami carca. Ajchataca mana pꞌitichinachu carcacuna.

Asha tiempo qꞌuipami Manoapaj churica huacharirca. Sansón shutitami churarcacuna. Ña huiñajpica Jehová Diosca achca fuerzatami paimanca curca. ¡Maquillahuanmi shuj leonta huañuchinata pudirca! Shuj cutinca 30 filisteocunatami pailla huañuchirca. Chaimantami filisteocunaca paitaca pꞌiñashpa ima shina huañuchinata yuyarcacuna. Shuj tutaca Sansón Gaza llajtapi dormicujpimi paipaj contracunaca cayandij tutamanta huañuchisha nishpa chai llajtapaj pungucunapi shuyanaman rircacuna. Pero Sansonca chaupi tutatami chai llajtapaj pircacunamanta pungucunata surcurca. Qꞌuipaca aparishpami Hebrón cꞌuchu shuj jatun urcu jahuaman aparca.

Filisteocunaca Sansonpaj novia Dalilahuanmi parlanacunaman rircacuna. Paicunaca, ‘Sansón imamanta yallitaj fuerzata charishcata yachashpa ñucanchijman huillajpica canmanca achca cullquitami cushun. Paitaca prezupimi churasha ninchij’ nircacunami. Dalilaca cullquita munashpami ari nirca. Callaripica Sansonca Dalila imamantataj fuerzayuj cangui nijpica mana huillarcachu. Pero cutin cutin huillahuai nishpa pꞌiñachijpimi Sansonca, ‘ñuca ajchataca nunca mana pꞌitishcanichu. Nazareomi cani. Ñuca ajchata pꞌitijpica fuerzaca ñucamanta anchunmanllami’ nirca. Dalilaman huillashpaca mana allitami Sansonca rurarca ¿nachu?

Dalilaca utcami filisteocunamanca, ‘imamanta fuerzata charishcataca ñami yachani’ nirca. Dalilaca changa jahuapi  dormichishpami Sansonpaj ajchata pꞌitichun cayarca. Qꞌuipaca ¡Sansón, filisteocunaca canta japinaman shamunmari! nishpami caparirca. Sansón rijcharishpaca fuerza illaj cashcatami cuentata curca. Chaipimi filisteocunaca ñahuicunata surcushpa prezupi churarcacuna.

Shuj punllaca achca filisteocunami paicunapaj dios Dagonta adorana huasipi tandanacurcacuna. Paicunaca, ‘ñucanchij diosmari Sansontaca ñucanchij maquipi churarca. Paimanta asingapaj pushamuichij’ nircacuna. Ishqui columnacunapaj chaupipi churashpami paimanta burlarircacuna. Sansonca sinchita rimarishpami, ‘Jehová Dioslla shuj cutinllahuan fuerzata cuhuai’ nirca. Paipaj ajchapish ñami huiñashca carca. Chaimantami chai ishqui columnacunataca tucui fuerzahuan tꞌangarca. Chaipimi chai huasi urmashpaca tucuicunata huañuchircacuna. Sansonpish huañurcami.