Israel runakuna taytacha-mamachakunataña kaqmanta yupaychaptinkum, Jehova Diosqa saqirqa Filistea runakuna ñakarichinankupaq. Ichaqa karqataqmi Jehova Diosman sunqu Manoa sutiyuq runa. Paypa warminmi mana wachakuq karqa, chaymi Jehova Diosqa angelninwan Manoapa warminman kaynata willachirqa: “Filistea runakunamanta Israel runakunata librananpaqmi wawata wachakunki. Payqa Diospaq sapaqchasqam kanqa”, nispa. Diospaq sapaqchasqakunaqa manam chukchankuta rutukuqkuchu.

Manoapa churin naceruptinmi Sansonwan suticharqaku. Chay wawaqa wiñaruspanmi Jehova Diospa yanapakuyninwan llumpay kallpasapa karqa, chaymi makillanwan leontapas wañuchiq. Sapallantaqmi 30 Filistea runakunatapas wañurachirqa, chayraykum Filistea runakunaqa wañuchiyta munarqaku. Huk tutam Gaza sutiyuq llaqtapi puñuchkaptin enemigonkuna punkupi suyarqaku wañuchinankupaq. Ichaqa chawpi tutata lluqsiruspanmi Sansonqa, llaqtapa punkunta hurquruspan Hebronpa hichpan law urquman aparurqa.

Hinaptinmi Filistea runakunaqa Dalila sutiyuq warmita nirqaku: “Imarayku Sanson kallpasapa kasqanmanta willaykuwaptikikuqa, achka qullqitam qusqaykiku”, nispa. Dalilaqa qullqiraykum “arí” niykurqa, chayraykum Sansonta tapupayarqa imanpi kallpan kasqanmanta. Sansonñataqmi mana willakurqachu, ichaqa huk kutipim hikutapayaptin kaynata willaykurqa: “Diospaq sapaqchasqa kasqayraykum chukchaytaqa mana pipas rutuwarqachu. Ruturuwaptinqa manañam kallpay kanmanñachu”, nispa.

Chayta yacharuspanmi Dalilaqa chaylla Filistea runakunaman willaykurqa. Chaymantam millqayninpi puñurachispan, huknin Filistea runawan Sansonpa chukchanta ruturachirqa. Hinaspam qaparirqa:  “¡Sanson, Filistea runakunam hapisuchkankiña!”, nispa. Sansonñataqmi rikcharirurqa manaña kallpayuq. Chayraykum Filistea runakunaqa presocharuspanku ñawintapas hurqururqaku.

Huk punchawmi Filistea runakuna taytachanku Dagonta yupaychanankupaq huñunakurqaku, chaypim kaynata qaparirqaku: “Kay taytachanchikmi Sansonta quykuwanchik. Asichiwananchikpaqyá Sansonta pusamuychik”, nispa. Ichaqa columnakunapa chawpinpi sayaykachiptinkum Sansonqa qaparispan nirqa: “Jehova Diosnilláy kunanllañayá kallpata quykuway”, nispa. Chukchanpas hatunña kaptinmi Sansonqa columnakunata tuñiykachirqa, chaynapim lliw Filistea runakuna wañururqaku.