Israel runakunaqa wajmantan idolokunata adoraranku, chaymi Jehová Diosqa permitiran Filistea runakuna kamachinanta. Wakinmi ichaqa Diosta munakuranku. Jujninmi karan Manóa esposanpiwan. Paykunaqa mana wawayoqmi karanku. Juj p’unchaymi Diosqa juj angelta kacharan Manoaq esposanta ninanpaq: “Qhari wawatan onqokunki, paymi Israel llaqtata salvanqa Filistea runakunamanta. Nazareo runataq kanqa”, nispa. ¿Pikunan karanku nazareo runakuna? Paykunaqa jujniraytan Diosta serviqku, manataqmi chujchankuta rutuchikuqkuchu.

Tiempowanmi Manoaq wawan naceran, sutinmi karan Sansón. Wiñaqtinmi Jehová Diosqa kallpata qoran. ¡Makinkunallawanmi juj leonta wañuchiran! Juj kutinmi 30 Filistea runakunata wañuchiran. Chaymi chay runakunaqa payta cheqnikuranku, wañuchiytataq munaranku. Sansón Gaza llaqtapi kashaqtinmi enemigonkunaqa punkupi suyasharanku tutamantanta wañuchinankupaq. Sansonmi ichaqa kuska tutata jatarispa llaqtaman jaykuna jatunkaray punkuta orqoran, jinaspa Hebrón orqoq chimpanman aparan.

Chay qhepamanmi Filistea runakunaqa Sansonpa novian Dalilata niranku: “Sichus yacharunki imaynapi Sansón kallpayoq kasqanta chayqa, askha qolqetan pagasaykiku carcelmanmi wisq’ayta munayku”, nispa. Dalilaqa qolqetan munaran, jinan aceptaran paykunaq nisqanta. Qallariypin Sansonqa manan willayta munaranchu imaynapi kallpayoq kasqanta. Dalilan ichaqa umanta wasaparan tapupayaspa, jinan willaran: “Manan jayk’aqpas chujchayta rutuwankuchu nazareo kasqayrayku. Chujchayta rutuwaqtinkuqa manan kallpay kanmanchu”, nispa. Dalilaman willasqanqa manan allinchu karan ¿riki?

Chay qhepallamanmi Dalilaqa Filistea runakunata niran: “¡Yachaniñan imaynapi kallpayoq kasqanta!”, nispa. Chaymi  Dalilaqa Sansonta moqon patapi puñurachispa chujchanta ruturachiran. Jinan Dalilaqa kallpawan niran: “¡Sansón, Filistea runakunan kaypi kashanku!”, nispa. Sansontaq rijch’ariran, ichaqa manañan kallpan karanchu. Chaymi Filistea runakunaqa ñawinkunata orqospa carcelman wisq’aranku.

Juj p’unchaymi waranqanpi Filistea runakunaqa Dagón diosninkuq templonpi juñukuspa qapariranku: “Diosninchismi Sansonta jap’ichiwanchis. Sansonta orqomuychis juj rato asichiwananchispaq”, nispa. Jinan iskay columnakunaq chaupinpi sayachispa burlakuranku. Sansontaq kallpawan niran: “¡Jehová Diosníy, kallpata qoway!”, nispa. Chujchanqa wajmantan wiñarusqa, chaymi iskaynin columnakunata tukuy kallpanwan tanqarpariran. Jinan chay temploqa urmayamuspa llapa chaypi kaqkunata wañuchiran, Sansonpas chaypin wañuran.