Бут израильтяноря упалэ линэ тэлён хохавнэ дэвлэнди. Важ када о Иегова домэкля, кай и филистимляноря тэ стерэн лэнди вэрытимос. Но дэсавэ андар лэндэ любинас лэ Иеговас. Кацаво мануш сас о Мано́ё. Лэстэ ла хулаяса на слинэ бэятцэ. Еқвар о Иегова бишалдя лэ анӷелос каринг лэ Маноёсти хулаи. О анӷело ԥэндя: «Тутэ арақадёлапэ шаво, и во фэрия о Израилё лэ вороӷонэндар. Во авэла лэ Иеговаско служителё, и най кацаво сар авэр служителя». Пэ кацавэ служителя ԥэнэн назореёря. Лэнди нащи сас тэ подшынэн и бал.

Прожыля набут время и кай о Мано́ё арақаделяпэ шаво. Во приақардя лэс Самсоно. О Самсоно вибареля и о Иегова дя лэсти фартэ баро зор. Лэстэ сас зор, кай тэ умарэл лэ левос би нисоско! Еқвар о Самсоно екжэно умардя 30 муршэн, савэ слинэ анда Филистия. Вонэ фартэ холяйлэ пэр лэстэ и закамлэ лэс тэ умарэн. Еқвар, о Самсоно ашэляпэ тэ рятярэл андо форо Га́за. Кодэла, ко камэнас лэс тэ умарэн, авелэ и гараделэпэ паша лэ форостирэ вороты, кай рано тэсара тэ стерэн када. Но о Самсоно ущеля андэ машкар рят, жыля каринг кодэла вороты и вишындя лэн анда стина. Во стодя лэн пэсти пэ ԥиқэ и андярдя упрэ по плай, саво сас найдур лэ форостар Хевроно.

Прожыля время и филистимляноря авелэ каринг и Далида, савя любияс о Самсоно. Вонэ ԥэндэ: «Амэ даса тути фартэ, фартэ бут руп, сар уӷанэса, васо кай о Самсоно кацаво баро зор. Амэ камас лэс тэ сԥандас и тэ стас андо баруно». И Далида любияс ловэ и важ када ԥэндя, кай уӷанэна. Май англал о Самсоно на росԥэнэнас лати, васо лэстэ кацаво баро зор. Но вой вихалас лэсти оди, и акэ, во росԥэнэн: «Ман никала на подшынэнас, важ кода кай мэ назареё. Сар манди тэ подшынэн и бал, мэ хасарава мэрно зор». О Самсоно росԥэндя када и кадэлэса во стердя бари бида. Чаче?

И Далида сразу ԥэндя када лэ филистимлянонэнди: «Мэ уӷанглэм, васо лэстэ кацаво зор!» Кала о Самсоно засутя латэ пэ чанга, вой  ақардя лэ слуӷос, саво подшындя лэсти и бал. После када вой зацыписайля: «Самсоно, и филистимляноря жан!» О Самсоно прошутяпэ. Но кодэва баро зор, будэр лэстэ на сас. И филистимляноря хутилдэ лэс, вилинэ лэсти и яқа и стодэ андо баруно.

Еқвар, фартэ бут филистимляноря стидэпэ андо храмо, саво лэ Дагоноско, лэндирэ дэвлэско. Вонэ линэ тэ цыпин: «Амаро дэл отдя амэнди андэ вас лэ Самсонос! Анэн лэс кардэ, кай тэ поасас лэстар». Вонэ стодэ лэс пэ машкар дуй столборя и линэ тэ асан лэстар. О Самсоно мангляпэ: «Иегова, мангав тут, дэ манди хоть инке еқвар кацаво же баро зор!» Каринг кадэя время и бал кай о Самсоно отбарелэ. Во анда вся зор ля тэ тасавэл и столборя, савэ слинэ андо храмо. И о храмо пэля пэр лэндэ. Помулинэ всаворэ, ко котэ сас. Кадяжэ муля и о Самсоно.