Aisraeli azinji adzatoma pontho kulambira adzimunthu, natenepa Yahova atawirisa kuti Afilisti aathabuse. Mbwenye akhalipo Aisraeli akuti akhafuna Yahova. M’bodzi wa iwo akhali Manowa. Iye na nkazace nee akhali na ana. Ntsiku inango Yahova atuma anju toera kulonga na nkazi wa Manowa. Anju ampanga: ‘Unadzabala mwana wamamuna. Iye anadzapulumusa Aisraeli m’manja mwa Afilisti. Anadzakhala Nazireu.’ Usadziwa Anazireu akhali ani? Akhali atumiki akupambulika a Yahova. Anazireu nee akhatawiriswa kucinga tsisi.

Mukupita kwa ndzidzi, Manowa adzakhala na mwana mbancemera Sansoni. Mudakula iye, Yahova ampasa mphambvu kakamwe. Iye mbadakwanisa kupha nkhalamu na manja. Paulendo unango Sansoni apha Afilisti akukwana 30. Afilisti akhamuida mbasaka njira toera kumupha. Ntsiku inango namasiku pikhagona Sansoni ku Gaza, iwo aenda ku nsuwo wa nzinda mbadikhira Sansoni toera kumupha namacibese. Mbwenye pakati pa masiku, Sansoni alamuka mbaenda ku nsuwo wa nzinda mbaukhutca pa mpanda. Iye authuka paphewa mbaenda nawo mpaka cifupi na phiri ya Hebroni!

Buluka penepo, Afilisti aenda kuna mankhadzi wa Sansoni, Dhalila, mbampanga: ‘Tinadzakupasa kobiri zizinji za parata ungatipanga pinacitisa Sansoni kukhala na mphambvu. Tisafuna kum’phata na kumuikha n’kaidi.’ Dhalila atawira, thangwi akhafuna kobiri. Pakutoma, Sansoni akhakhonda kumpanga kudabuluka mphambvu yace. Mbwenye Dhalila ankakamiza mpaka Sansoni kumpanga cibisobiso cace. Iye alonga: ‘Cipo ndacingwa tsisi thangwi ndine Nazireu. Tsisi yanga ingacingwa, mphambvu yanga inadzamala.’ Sansoni aipisa kakamwe thangwi yakulonga pyenepi.

Mwakukhonda dembuka Dhalila apanga Afilisti: ‘Ndisadziwa cibisobiso cace!’ Iye acitisa Sansoni kugona pa miyendo yace, buluka penepo apanga munthu toera kucinga tsisi ya Sansoni. Dhalila  alonga mwakugaluza: ‘Sansoni, Afilisti ali pano!’ Mudalamuka iye, nee akhalibve na mphambvu. Afilisti am’manga, amuswa maso, mbamuikha n’kaidi.

Ntsiku inango, Afilisti azinji agumanyikana mu templo ya mulungu wawo Dhagoni, mbakhuwa: ‘Mulungu wathu atipasa Sansoni! M’bwereseni toera atibalangaze.’ Iwo amuikha patsogolo pawo pakati pa mizati miwiri, mbansingirira. Sansoni aphembera: ‘Ndaphata miyendo Yahova, ndipaseni mphambvu paulendo uno basi.’ Mu ndzidzi unoyu, tsisi ya Sansoni ikhadakula pontho. Iye agwisa mizati ya templo na mphambvu yace yonsene. Templo yagwa. Anthu onsene akhali mwenemo afa, pontho Sansoni afambo.