Gbâ ti azo ti Israël akiri akomanse ti voro ayanda, ni la asara si Jéhovah azia lege na aPhilistin ti duti na ngangu na ndö ti kodro ti ala. Me ambeni zo ti Israël aye Jéhovah. Mbeni oko ti ala ayeke Manoah. Lo na wali ti lo ayeke na molenge ape. Mbeni lâ, Jéhovah atokua mbeni ange na wali ti Manoah. Ange ni atene na lo: ‘Mo yeke dü ande mbeni molenge-koli. Lo yeke sö ande azo ti Israël na maboko ti aPhilistin. Lo yeke duti ande mbeni Naziréen.’ Me aNaziréen ayeke lani azo wa? A yeke ambeni wakua ti Jéhovah so ayeke nde. A hunda lani na aNaziréen ti fâ kuä ti li ti ala ape.

Ambeni ngoi na pekoni, wali ti Manoah adü molenge-koli, na a zia iri ti lo Samson. Na ngoi so Samson akono, Jéhovah asara si lo ga mbeni ngangu zo. Lo peut ti fâ bamara gï na maboko senge. Mbeni lâ, Samson lo oko lo fâ aPhilistin 30. A-Philistin aye tënë ti lo ape na ala yeke gi lege kue ti fâ lo. Na mbeni bï, na ngoi so Samson ayeke lango na Gaza, ala gue na porte ti yanga ti gbata ni na ala yeke ku ti tene ala fâ lo na yanga ti ndapre ni. Me na milieu ti bï ni, Samson alondo, lo gue na yanga ti kodro ni, na lo gboto aporte ti yanga ti gbagba ni. Lo yô ni na ndö ti go ti lo, lo gue na ni juska na li ti mbeni hoto nduru na Hébron!

Na pekoni, aPhilistin ni ague na ndo ti Dalila, mbeni wali so Samson aye lo mingi, na ala tene: ‘E yeke mû na mo gbâ ti nginza tongana mo gi ti hinga ngbanga ti nyen la Samson ayeke ngangu mingi tongaso. E ye ti gbu lo na ti zia lo na kanga.’ Teti so Dalila aye nginza, lo yeda ti sara ni. Na tongo nda ni, Samson ake ti fa na lo ngbanga ti nyen la ni yeke ngangu mingi so. Me Dalila ason li ti Samson ngbii juska lo fa na lo ndani. Lo tene na lo, lo tene: ‘A fâ kuä ti li ti mbi lâ oko ape ndali ti so mbi yeke mbeni Naziréen. Tongana a fâ kuä ti li ti mbi, mbi yeke perdre ngangu ti mbi.’ Samson asara kota erreur la lo tene na lo tënë ni so, ni la ape?

 Dalila ague droit atene na aPhilistin: ‘Mbi hinga secret ti lo ni awe!’ Dalila asara si Samson alango na ndö ti gere ti lo, na lo ngbâ lo iri mbeni zo aga afâ kuä ti li ti Samson. Dalila angbâ adekongo, atene: ‘Samson, bâ aPhilistin ayeke ga!’ Samson alondo, me lo yeke na ngangu encore ape. A-Philistin ni agbu lo, ala buba lê ti lo na ala bi lo na da ti kanga.

Mbeni lâ, gbâ ti aPhilistin abungbi na yâ ti temple ti nzapa ti ala Dagon, na ala dekongo, atene: ‘Nzapa ti e asara si e gbu Samson! Ala sigi na Samson ni! Zia e sara ngia na lo kete si.’ Ala zia lo luti na milieu ti apilier ti da use, na ala komanse ti he lo. Samson airi Jéhovah, lo tene: ‘Jéhovah, mû na mbi ngangu ti tanga ni.’ Andâ kuä ti li ti Samson akiri asuku awe. Lo pusu apilier ti temple ni na ngangu ti lo kue. Da ni kue angbâ atuku na sese, azo kue so ayeke na yâ ti temple ni akui, Samson nga kue.