Lawọ tau Israel saụ nẹ̌bal᷊ị něněmbah berhala, hakị u ene Yehuwa němala tau Filistin něngawasa banuang i sire. Katewe, piạ pirang katau tau Israel bědang makěndagẹ̌ si Yehuwa. Sěngkatau bọu i sire ute i Manoah. I sie dingangu kawinge tawẹ apa anạ. Piạ su sahěllo, Yehuwa něndolohẹ̌ malaekatẹ̌ sarang kawing i Manoah. Malaekatẹ̌ ene naul᷊ị, ’I kau sarung makaěbạ anạ. I sie sarung měnal᷊amatẹ̌ Israel bọu tau Filistin. I sie sarung makoạ tau Nazir.’ Apa i kau masingkạ apa tau Nazir ene? I sire ene kai ělang i Yehuwa kụ nakaěbạ tugasẹ̌ khusus. I sire tawe wotonge měmotọ utạ i sire.

Bọu ene anạ i Manoah nalahirẹ̌, kụ i sie něgělị arenge, Simson. Su tempong i Simson seng naguwạ, Yehuwa někoạ si sie sěbạe matoghasẹ̌. I sie botonge měmate singa kětạeng dingangu limane. I sie hala lai bọu němate 30 su kataune tau Filistin. Tau Filistin mawěnsing si sie kụ mědẹ̌dea cara gunang měmate si sie. Piạ su sěhěbi, i Simson ene su Gaza. Su tempong i sie mětẹ̌tikị, i sire nakoạ sarang gerbang kụ něngampal᷊ẹ̌ sene tadeạu makapate si sie dịěllone mal᷊ukadẹ̌. Katewe su hěbị ene i Simson nẹ̌bangung kụ nakoạ sarang gerbang bọu ene něnawụ gerbang ene. I sie němasaěng gerbang ene sarang bongkong bul᷊udẹ̌ maraning Hebron!

Samurine, tau Filistin nẹ̌sombang dingangi Delila, sintị i Simson, kụ naul᷊ị, ’I kami sarung měgělị lawọ doitẹ̌ si kau mạeng i kau maul᷊ị si kami kawe i Simson sěbạe matoghasẹ̌. I kami sarung měnamẹ kụ měnuẹ̌ si sie su penjara.’ Ual᷊ingu i Delila mapulu roitẹ̌ ene, i sie setuju. Humotong, i Simson madiri maul᷊ị si Delila kawe nụe i sie sěbạe matoghasẹ̌. Katewe ual᷊ingu i Delila turusẹ̌ měngẹ̌ngologẹ̌, samurine i Simson nẹ̌běke rahasiane. Simson naul᷊ị, ’Utạku tawe pẹ̌potọkang ual᷊ingu iạ tau Nazir. Mạeng utạku potọkang, katatoghasẹ̌ku sarung mailang.’ Sěběnarẹ̌e i Simson tawe wotonge mẹ̌běke si sie.

 Delila apidu naul᷊ị su tau Filistin, ’Iạ masingkạ rahasiane!’ Delila někoạ si Simson nikahuntikilang su palange kụ něngoro taumata wal᷊inẹ pěmotọ utạ i Simson. Bọu ene i Delila němansagẹ̌, ’Simson, piạ tau Filistin!’ I Simson napuko kụ katatoghase nailang. Tau Filistin něnamẹ si sie, napakawuta matane, kụ nẹ̌taho si sie su penjara.

Su sěngkatempo, hiwune tau Filistin nẹ̌komol᷊ẹ̌ su tampạ pěnaněmbang Dagon, dewang i sire, kụ měmẹ̌mansagẹ̌, ’Dewang i kitẹ seng něnarakang i Simson si kitẹ! Pasěbang i Simson! Mahịe i kitẹ mělangehẹ̌ si sie.’ I sire něngoro si Simson darisị su tal᷊oarang darua dihi gěguwạ, kụ nělangehẹ̌ si sie. I Simson nẹ̌doa, ’Yehuwa, sěnsul᷊ẹko lai gělịko katatoghasẹ̌ si siạ.’ Su tempo ene, utạ i Simson seng saụ nanandụ. I sie něnuhudẹ̌ manga rihi ene dingangu kěbị katatoghase. Tampạ ene nahaka, kụ kěbị taumata su tampạ ene nate. I Simson lai nate.